Вести › Набрзинка

Кај сите загинати во Кочани констатирана насилна смрт од задушување

21 март 2025

Насилна смрт од задушување е констатирана кај сите 59 лица што загинаа во пожарот во дискотеката во Кочани.
Деканот на Медицинскиот факултет во Скопје, Светозар Антовиќ и раководителот на Институтот за судска медицина, Александар Станков соопштија дека по трагичниот настан во Кочани за многу кусо време биле извршени обдукциите на телата и биле идентификувани починатите.
„Целта беше брзо завршување на обдукциите кои почнаа вечерта на 16 март, а завршија претпладнето на 18 март, како и точна, прецизна идентификација“, истакна Станков.
Биле формирани 6 тима во кои, освен експерти од Судска медицина, имало и патолози, а вклучени биле и екипи од МВР.

извор

Одреден 30-дневен притвор за 24 осомничени лица за трагедијата во Кочани

22 март 2025

Основниот суд Кочани определил 30-дневен притвор за 24 лица од вкупно 27 опфатени со истрагата за трагедијата во дискотеката „Пулс“ во Кочани, во која животите ги загубија 59 лица.
Меѓу лицата за кои е одреден притвор се и градоначалникот на Кочани во заминување Љупчо Папазов, како и поранешните градоначалници Ратко Димитровски и Николчо Илијев.

Во првата фаза во постапувањето на МВР и Обвнителството, поднесени се кривични пријави против 34 физички и три правни лица, за кривично дело „тешки дела против општата сигурност“ во врска со „предизвикување општа опасност“. Едно лице е пријавено и за „примање поткуп“.
Лицата се сомничат дека „како соизвршители, изготвувајќи, потпишувајќи и одобрувајќи позитивна согласност, му овозможиле на правно лице да се стекне со лиценца за вршење угостителска дејност – кабаре иако објектот не ги исполнувал законските услови за работа“.
Во одделна постапка во врска со трагедијата, Основното јавно обвинителство за гонење на организиран криминал и корупција (ОЈО ГОКК) отвори истрага против седум високи полициски службеници од Секторот за внатрешни работи Штип и Полициската станица од општа надлежност Кочани, на кои веќе им одреден 30-дневен притвор.

извор

Израел повторно удри врз јужен Либан

22 март 2025

Израелски авиони и артилерија нападнаа цели врз јужен Либан, прв пат откако на 27 ноември постигна договор со Хезболах за прекин на огнот.
Либанските власти соопштија дека загинале едно дете и едно возрасно лице, а осуммина се повредени.
Израелските сили објавија дека нападот бил реакција на три ракети истрелани од Либан кон израелското погранично село Метула. Хезболах негира дека истрелал ракети.
Хезболах почна ракетна канонада врз Израел на 8 октомври 2023 година, еден ден по терористичкиот напад на Хамас од Газа. Израел возврати со бомбардирање и копнена офанзива. Загинаа повеќе од 4.000 луѓе во Либан, а 1,2 милион беа принудени да ги напуштат домовите.

извор