Вести › Набрзинка

Јадете ли 30 различни билки неделно?

14 јули 2025

Овошје, зеленчук, јаткасти плодови, зачински билки.... оние кои успеваат да јадат 30 различни растителни видови неделно имаат подобро варење, покажува американска нутриционистичка студија.
„Досега верувавме дека пресудна е количината, но оваа студија покажа дека разновидноста на растителните влакна е клучна“, вели еден од авторите.
Во препорачаната мешавина се дозволуваат и мешунки како грав и грашок а влакна имаат дури и кафето и тофуто.
Разновидноста на влакната е од корист за микробиомот - мноштвото ситни бактерии што ги населуваат цревата и се одговорни за добро варење и многу повеќе. „Широкиот и разновиден микробиом може да помогне во спречувањето на дигестивни инфекции“, објаснува гастроентерологот Кристијан Сина.

извор

Ултиматум од Трамп за Путин: Мир за 50 дена или тарифи од 100%

14 јули 2025

Доналд Трамп најави дека САД ќе ѝ дадат најмодерно оружје на Украина (кое ќе го платат сојузниците од НАТО), а на Русија ѝ се закани со тарифи од 100% ако во рок од 50 дена не ја прекине војната.
Претседателот најави дека 17 противвоздушни системи Патриот може да ѝ бидат испорачани на Украина за неколку дена. Европските членки на НАТО ќе ѝ ги достават своите, а ќе ги заменат со нови купени од САД.
Ако Москва до крајот на август не ја запре војната, САД ќе воведат секундарни тарифи за нејзините трговски партнери. Секоја земја што тргува со Русија ќе се соочи со царини од 100%. Тоа важи и за редовните купувачи на руска нафта, која сочинува 60% од извозот на Русија.
Трамп изјави дека е фрустриран од рускиот претседател Владимир Путин, за кој кажа дека зборува за мир, но продолжува да ги бомбардира украинските градови.
„Кога тоа ќе се случи три или четири пати, ќе сфатите дека разговорите не значат ништо. Не сакам да го наречам убиец, ама тој е цврст тип. Се покажа низ годините, насамари многумина - Клинтон, Буш, Обама, Бајден. Не ме насамари мене. Во некој момент ќе почнете наместо со зборови да разговарате со акции“, изјави Трамп.

извор

ББЦ прифати одговорност за врската на Хамас со документарец за Газа

14 јули 2025

Документарниот филм на ББЦ „Газа: Како да се преживее воена зона“ ги прекршил уредувачките норми за точност, бидејќи на гледачите не им било откриено дека детето-наратор е син на министер на Хамас, откри интерна ревизија.
Документарецот во независна продукција на Хојо филмс беше повлечен од содржината на ББЦ по реакциите.
„Статусот на таткото е критична информација, која не била споделена со ББЦ пред емитувањето. Без оглед како била оценета важноста на позицијата на таткото на нараторот, публиката требало да биде информирана за ова“, заклучи Питер Џонстон, директор за жалби и рецензии на ББЦ.
Никое од лицата ангажирани во филмот не биле членови на Хамас ниту биле цел на финансиски санкции. На нараторот му бил платен хонорар од 795 фунти.

извор