- Русија им понуди на САД заеднички да ги експлоатираат ретките минерали на украинска територија што е под руска окупација. „Спремни сме да привлечеме странски партнери за овие таканаречени нови територии, до нашите историски територии, кои ѝ ги вратиме на Руската Федерација“, изјави претседателот Владимир Путин. Тој додаде дека американските инвестиции се добредојдени и во Русија, на пример во топилницата за алуминиум во Краснојарск.
- Путин објасни дека Русија има „многу поголеми резерви на ретки минерали“ и воопшто не ѝ пречи САД со украински руди да ги наплатат стотиците милијарди долари што му ги даваа на Киев како воена и друга помош.
- Володимир Зеленски ја одби првата понуда од САД, со која Украина требаше да им даде на САД 50% од профитот од своите руди. Втората понуда е уште посурова - Киев да се откаже од ќарот од рудите, нафтата и гасот, плус од пристаништата и инфраструктурата, сè додека фондот за компензација не достигне 500 милијарди долари.
- И Европската Унија со задоцнување му понуди на Киев „вин-вин“ зделка за украинските критични материјали. „Поволноста на понудата од Европа е тоа што ние никогаш нема да бараме договор што не е во заедничка полза“, изјави еврокомесарот за индустриска стратегија Стефан Сежурне.
- Шеснаесетгодишно момче е приведено во Москва поради убиството на Алексеј Бељаев, заменик-шеф на агенцијата Роскомнадзор задолжена за цензура на интернетот во Русија.
- Според неофицијални извори, момчето Артјом А. со нож го нападнало Бељаев на влезот во агенцијата на 19 јануари. Нема никакви официјални записи за инцидентот.
- Агенти од Федералната служба за безбедност брзо интервенирале и наметнале најстрога информациска блокада. Две недели не била објавена вест за убиството ни по медиумите ни на социјалните мрежи.
- Во објава што брзо била отстранета од платформата Телеграм, мајката на момчето напишала дека нејзиниот син е обвинет за „убиство со политички или идеолошки мотиви“. Обвинителите тврдат дека Артјом е „жесток противник на активностите на Роскомнадзор“ и дека го планирал убиството.
- Одделението на Бељаев е задолжено за блокирање сајтови, пренасочување интернет сообраќај и борба против заобиколување на наметнатите ограничувања.
- Француската полиција за кибернетски криминал со поддршка од Европол упадна во париските канцеларии на платформата X на Илон Маск, во врска со истрага за „политичка пристрасност на алгоритмите“.
- Истрагата е отворена во јануари 2025 година, откако либералниот пратеник Ерик Боторел јавно изрази загриженост поради „мешање во управувањето“ со платформата откако беше купена од Маск.
- Директорот за сајбер безбедност во државната служба поднесе посебна жалба поради „промените во алгоритмот на X што ја засилиле непријатната политичка содржина“,
- „Истрагата беше проширена по други извештаи во кои се осудува работењето на Grok на платформата X, што доведе до ширење содржина за негирање на Холокаустот и сексуални дипфејкови“, соопшти Обвинителството.
- Сопственикот Илон Маск и поранешната директорка Линда Јакарино се повикани на „доброволно сослушување“ на 20 април во Париз. Како потенцијални сведоци, повикани се и вработени во компанијата.
