Вести › Набрзинка

Грузија го затвора инфоцентарот за НАТО и ЕУ

4 јуни 2025

Грузиската влада ќе го затвори информативниот центар за НАТО и ЕУ во Тбилиси. Ќе го припои кон Министерството за надворешни работи и ќе ги отпушти вишокот службеници.
Центарот беше отворен во 2005 година на централниот Плоштад на Слободата во Тбилиси, во голема зграда над која се вееја знамињата на ЕУ, НАТО и на Грузија. На неговиот сајт како главна цел е наведено: „поврзување на нашето население со процесите на европска и евроатлантска интеграција“.
Намерата за приклучување во ЕУ е вградена во Уставот на Грузија. Kандидат за членство во ЕУ e од 2023 година. НАТО во 2008 година соопшти дека е отворен за прием на поранешната советска република со 3,6 милиони жители.
Владејачката партија Грузиски сон во ноември објави дека до 2028 година ќе ги прекине пристапните преговори со Унијата, бидејќи сака да одржува добри односи и со Русија, со која нема дипломатски односи по меѓусебната војна во 2008 година.
И ЕУ ја замрзна апликацијата на Грузија поради усвојувањето на закон за „странски агенти“, критикуван како рестриктивен и проруски.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор