Вести › Набрзинка

Газа 30 години ќе ја чистат од бомби

24 октомври 2025

Ќе бидат потребни 20 до 30 години за да се исчисти површината на Газа од неексплодирани бомби и мини, предупредува хуманитарната организација Хуманост и инклузивност.
За време на двегодишната војна, од ваков вид муниција загинале 53 луѓе во Газа, а стотици биле повредени. Огнот сега официјално запре, но неексплодираните бомби сè уште може да се активираат. Многу објекти се минирани.
„Не е возможно да се исчисти сета муниција, зашто голем дел е закопана или е под урнатини. Онаа што е видлива на површината можно е да се отстрани во тек на 20 до 30 години. Но, тоа ќе биде само мал дел од многу голем проблем“, предупреди Ник Ор, експерт за отстранување експлозиви, кој неколку пати ја посетил Газа за време на војната.
Седумчлена екипа на хуманитарната група од идната недела ќе почне мисија за откривање на неексплодираната муниција во критичните објекти - пред сè во болниците и пекарниците. Групата нема дозвола од Израел да ги отстранува или да ги деактивира бомбите.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор