Вести › Набрзинка

Европски лидери се охрабрија да разговараат со Путин

27 октомври 2026

Финскиот претседател Александар Стуб и норвешкиот премиер Јонас Гар Сторе денеска телефонски разговарале со рускиот претседател Владимир Путин за војната во Украина.
Стуб и Сторе, кои минатата недела во Осло беа домаќини на американскиот посредник Стив Виткоф и украинскиот претседател Зеленски, истакнаа дека разговорот со Путин бил „во име на нивните земји и на никој друг“.
Планот бил да разговараат 20 минути, но биле на линија час и половина. Сторе го опиша разговорот како „суштински, фокусиран на конкретните прашања и професионален“.
„Тој потсети на своите ставови за тоа како се развивал конфликтот од 2014 година – а ние ги изнесовме нашите позиции. Станува збор за добро познати ставови, кои можевме да ги сослушаме и на нив да одговориме“, изјави норвешкиот премиер.
Одговарајќи на критиките од данската премиерка Мете Фредериксен зошто не ја координирале иницијативата со европските партнери, Сторе одговори дека директно му ги пренеле своите ставови на Путин.
„Сметам дека водењето разговори и испраќањето соодветни пораки не е погрешно. Денес до Москва допираат пораки само од американската администрација. Сега се слушаат и гласови од две соседни држави – Финска и Норвешка – кои не зборуваат во име на другите, туку... во целосна усогласеност со ‘коалицијата на оние што сакаат да дејствуваат‘, кои делат исто мислење за природата на оваа војна и за тоа како таа треба да заврши“, изјави Сторе.

извор

Цветковиќ: Во Израел, со кичмата во куфер

27 октомври 2026

Тринаесетмина пратеници од македонското Собрание неодамна се вратија од службена посета на своите колеги од израелскиот парламент или Кнесет. Сега истите изигруваат жртви, изненадени и навредени, од, би рекла дури и срамежливите, реакции на јавноста, небаре отишле таму на шопинг, а не во име на македонскиот народ да дадат кукавичка поддршка на земја што врши окупација и хуманитарни трагедии врз палестинскиот народ.
Навикната, просечните македонски политичари да не можат да видат ништо подалеку од Табановце и Деве Баир, а камоли да разбираат деликатни и комплицирани политички, геостратешки и империјалистички глобални односи, ќе се обидам накусо да им „нацртам“ каде биле и пред кого ја свиткале кичмата, оптоварувајќи нè и нам со нивниот срам, кој очигледно не го чувствуваат.
Амнести интернешнел, по обемната истрага на убиствата, тешките повреди, уништувањето на цивилната инфраструктура и намерното наметнување услови што го загрозуваат опстанокот на населението, заклучи дека Израел врши геноцид врз Палестинците во Газа.
До истиот заклучок дојде и Независната меѓународна истражна комисија формирана од Советот за човекови права на ОН.
Досега во Газа се пријавени повеќе од 71.800 убиени Палестинци, меѓу кои најмалку 21.289 деца и над 171.000 повредени, пишува Ирена Цветковиќ за Призма.

извор

Се бара затворање на Информер, Вучиќ најавува прекин на комуникациите

27 октомври 2026

Независното здружение на новинарите на Србија и неколку нивни НВО партнери, до надлежното регулаторно тело покренаа иницијатива да му се одземе дозволата на про-вуќичевскиот медиум Информер.
Тоа го образложуваат со повеќегодишно системско кршење на програмските обврски кои регулаторот досега не ги санкционирал.
Иницијативата доаѓа еден ден откако група луѓе, предвоени од Дијана Хрка, мајката на едно настрадано момче од настрешницата во Нови Сад, насилно упаднаа во Информер и вербално го малтретираа нивниот главен уредник, Драган Вучиќевиќ.
Полицијата реагираше но со задршка, по што вработените во Информер беа безбедно извадени надвор.
„Ги молиме државните органи да работат многу поефикасно отколку вчера. Имате обврска да работите како државни органи, без оглед дали некого сакате или не. Она што се случи вчера беше ужасно. Дури кога пристигнаа припадниците на полициската бригада, беше спасен животот на Драган Вучиќевиќ“, изјави Александар Вучиќ.
Тој се закани дека неговата партија би можела самостојно да се организира доколку продолжат нападите врз нејзините поддржувачи.
„Ако ја згаснете телевизијата Информер, мислите дека имате право на тоа? Ние никогаш не ги допревме ниту Н1 ниту Нова С, иако навистина донесоа зло во оваа земја. Тоа е демократија и почитување на поинаквото мислење“, изјави Вучиќ.
Тој најави дека во таков случај нема да има политички дијалог со противниците во следните четири години.