- САД сакаат Европа до 2027 година да преземе поголем дел од конвенционалните одбранбени капацитети на НАТО, од разузнавањето до ракетните системи, порачале офицери од Пентагон на средба со дипломати од неколку европски земји.
- Вашингтон сè уште не е задоволен од чекорите на европските сојузници за зајакнување на своите одбранбени капацитети по руската инвазија врз Украина во 2022 година. Ако Европа не го исполни рокот до 2027 година, САД може да престанат да учествуваат во некои механизми за координација на одбраната на НАТО.
- Европски претставници реагираат дека рокот до 2027 година не е реалистичен, бидејќи дури и да купат оружја и одбранбени системи произведени во САД, би морале да чекаат со години да бидат испорачани.
- Европската Унија постави цел континентот да биде подготвен самостојно да се брани до 2030 година. Аналитичари тврдат дека и тој рок е преамбициозен. Европа мора да ги пополни празнините во противвоздушната одбрана, беспилотните летала, капацитетите за сајбер војна и муниција.
- Иран формира нова дигитална платформа за осигурување „Ормуз сејф“, како ново владино тело за управување со бродскиот сообраќај низ Ормускиот проток. Платформата ќе се потпира на плаќања со криптовалути.
- Според планот на Министерството за економија, управувањето со теснецот преку рамка за осигурување би овозможило издавање на разни полиси за поморско осигурување, како и сертификати за финансиска одговорност, наместо да се наплаќа „патарина“. При идеални околности, ова би можело да генерира до 10 милијарди долари приходи за Техеран.
- Планот ќе почне со осигурување кое покрива инспекција, задржување и конфискација на бродови. Штетата од воени напади нема да биде покриена.
- „Овој модел би бил прифатлив за другите земји во мирно време, а сепак би му дозволил на Иран да врши контрола врз теснецот“, објави државната новинска агенција Фарс.
- Молдавските лидери ја осудија како „закана“ одлуката на Владимир Путин да го поедностави процесот на давање руско државјанство на жителите на регионот Придњестровие, кој се отцепи од Молдавија пред 36 години.
- Една половина од жителите на Придњестровие веќе имаат руско државјанство. Декретот на Путин објавен во петокот им овозможува на уште 350.000 луѓе да добијат руски пасоши без да го исполнат условот за постојан престој во Русија.
- „Ова е начин повторно да ни се закануваат, бидејќи на Русија не ѝ се допаѓаат нашите акции за реинтеграција. Веројатно им требаат повеќе луѓе за да испратат во војната во Украина“, изјави молдавската претседателка Маја Санду.
- Рускиот амбасадор во Кишињев, Олег Озеров, изјави дека потегот е од хуманитарни причини, во согласност со меѓународното право, поради „зголемениот притисок“ од Молдавија врз Русите. Тој ги оцени реакциите како „лицемерие“, бидејќи Молдавија им дозволува на нејзини граѓани да добиваат романски пасоши.
- Придњестровие се отцепи во 1990 година, кога Молдавија сè уште беше советска република. По двегодишен судир со повеќе од 1.000 жртви, двете страни се во мир, заштитуван од контингент од 1.500 руски војници. Регионот има свои политички институции - парламент, војска, полиција и поштенски систем.
