Претседателот Реџеп Таип Ердоган бара начин како да ѝ го врати на Русија противвоздушниот систем С-400 што го купи пред една деценија, за да бидат повлечени американските санкции за продажба на напредно оружје на Турција.
За ова прашање Ердоган во септември разговарал со американскиот претседател Доналд Трамп во Белата куќа, а пред една недела и со рускиот претседател Владимир Путин во Туркменистан.
Турција го купи системот С-400 во период на влошување на односите со партнерите од НАТО во времето на мандатот на Барак Обама. САД во 2019 година реагираа со забрана на продажба на напредно оружје на Турција, бидејќи вкрстувањето на рускиот систем со западните авиони би ѝ овозможило на Москва да собира чувствителни информации.
Турција балансира во односите кон САД и Русија. По руската инвазија врз Украина, Анкара одби да воведе санкции врз Москва, но го ограничи преминот на воени бродови низ Босфорот и му испорачуваше оружје на Киев.
Трајно и задолжително ќе им се одземаат возилата на дрските возачи кои значително ја надминуваат дозволената брзина и кои претходно веќе биле осудени за кривично дело против безбедноста на јавниот сообраќај, предвидуваат измените и дополнувањата на Кривичниот законик поднесени од група пратеници од ВМРО-ДПМНЕ.
Една од измените е дека судот може да изрече престанок на важење на возачката дозвола од определена категорија во траење од една до 10 години, а за тоа време, а понекогаш и подолго, сторителот нема право да се стекне со возачка дозвола од истата категорија.
Измените предвидуваат казна затвор од 3 месеци до 3 години или парична казна за тој што не се придржува на прописите за безбедност и ќе го загрози јавниот сообраќај безобѕирно управувајќи со моторно возило со: концентрација на алкохол над 1,5 г/кг во крвта, со употреба на дроги, психотропни супстанции или прекурсори, возејќи во спротивна насока на јавен пат, претекнувајќи колона возила на непрегледно место или возејќи со брзина која ја надминува дозволената брзина за најмалку 50 километри на час во населено место или за најмалку 70 километри на час надвор од населено место.
Истата казна ќе важи и затој што организира, учествува или на друг начин овозможува недозволени трки со возила.
Доналд Трамп го освежи „холот на претседателите“ во Белата куќа со табли со лични описи на своите претходници. На воведната плоча е објаснето дека колонадата со портретите е од почит кон поранешните претседатели, кои биле „добри, лоши и некаде во средината“. Портпаролката Каролин Ливит, изјави дека „многу од елоквентните описи се напишани од претседателот“.
Под сликата на автоматското пенкало, кое треба да го претставува Џо Бајден, со златни букви е напишано: „Поспаниот Џо Бајден несомнено е најлошиот претседател во американската историја... Ја презеде функцијата како резултат на најкорумпираните избори досега... Со прекар Поспаниот и Лажго, Џо Бајден беше под влијание на неговите радикални левичарски советници“.
Трамп бил многу повоздржан за описот на Обама: „Барак Хусеин Обама беше првиот црн претседател... Еден од најконтроверзните политички фигури во американската историја“.
Под портретот на Бил Клинтон е наведено дека „неговата сопруга Хилари во 2016 година загубила на избори од Трамп“, а за Џорџ В. Буш е запишано дека „ги почнал војните во Авганистан и во Ирак, кои не требало да се случат“.
За своите два мандати, Трамп запишал: „Ги поништил климатскиот пакт и договорот со Иран, го уништил Калифатот на ИСИС, ги потпишал Абрахамовите договори, наметнал царини и имиграциски политики, ги ослободил училиштата од трансродовите политики, ја почнал изградбата на Златната купола и на Салата за бал, го преименувал Мексиканскиот Залив во Американски и ја создал Најголемата економија во историјата на светот“.
