- Против Џон Болтон, поранешниот советник на Трамп за национална безбедност, е покренато федерално обвинение поради чување строго доверливи документи. „Овие документи содржеа разузнавачки информации за идни напади, странски противници и односи во надворешната политика“, се наведува во обвинението на 26 страници.
- Болтон е обвинет по 8 точки за пренесување информации за националната одбрана и 10 точки за незаконско задржување на доверливи материјали. Се соочува со максимална вкупна казна од 20 години затвор.
- Oбвиненијата се поврзани со дневниците што Болтон ги водел во својата 45-годишна кариера во јавната служба. Неговиот адвокат тврди дека Болтон ги споделил само со сопругата и ќерката.
- Болтон ја отфрла вината и најави дека на суд ќе се брани од „политичката одмазда“ на Трамп. „Станав најновата цел на користењето на Министерството за правда како оружје против оние што Трамп ги смета за непријатели, со обвиненија што претходно биле отфрлени или ги искривуваат фактите“, рече Болтон.
- Тој беше отпуштен од првата администрација на Трамп во 2019 година. Во мемоарите „Собата каде што се случи“, напиша дека Трамп бил лошо информиран за геополитиката. Суд ја одби тужбата од Белата куќа, која настојуваше да го спречи објавувањето на книгата, тврдејќи дека содржи класифицирани информации.
- Саудискиот фонд за јавни инвестиции што за 55 милијарди долари ја купија најпознатата компанија за видео-игри Electronic Arts (EA), креаторот на популарните игри Fifa, The Sims и Mass Effect. Во групата инвеститори е и Affinity Partners на Џаред Кушнер - зетот на претседателот Доналд Трамп.
- EA ќе биде трансформирана во приватна компанија. Инвеститорите ќе ги откупат сите акции од слободно тргување и компанијата повеќе нема да биде присутна на берзата.
- Ова е еден од најголемите откупи на компании со позајмен капитал. Саудискиот фонд вложува 36 милијарди долари, а 20 милијарди за трансакцијата позајми инвестициската банка JPMorgan. Аналитичари од Bloomberg предупредуваат дека отплатата на долгот може да резултира со масовни отпуштања, поагресивна монетизација и други мерки за намалување на трошоците во една од најголемите компании во индустријата за видео-игри.
- EA лани оствари приход од 7,5 милијарди долари. Во октомври за три дена продаде рекордни 7 милиони примероци од играта Battlefield 6, но и покрај тоа отпушти вработени вклучени во развојот на новото издание од серијалот.
- Кина одобри изградба на уште осум нуклеарни реактори, со чие врзување во мрежата ќе ја надмине Франција во капацитетот да генерира струја од нуклеарни извори.
- Инсталираниот капацитет за производство на нуклеарна енергија во Кина сега изнесува 63,98 гигавати со што за првпат го надминува капацитетот на Франција од 63 гигавати. САД се убедливо на првото место со 96,9 гигавати струја произведени од нуклеарни централи, според податоци од Светската нуклеарна асоцијација.
- Одобрени се три пара реактори од типот „Хуалонг“ капацитет од 1 гигават во постоечки централи, како и два од типот „Гуохе“ со капацитет од 1,4 гигавати во новата централа Лаијанг.
- Пекинг има долгорочна стратегија за проширување на производството на нуклеарна енергија заради зајакнување на енергетската безбедност, намалување на зависноста од фосилни горива и декарбонизација на индустријата.
