- Србија прогласи највисоко „црвено“ ниво на готовност поради терористичка закана откако малолетник од Шабац синоќа со нож нападнал припадник на Жандармеријата пред Амбасадата на Израел во Белград. Полицискиот службеник дејствувал во самоодбрана и го убил напаѓачот.
- Според српското МВР, малолетникот извикал „Алаху Акбар“, со два ножа го нападнал полицискиот службеник и го ранил во лицето.
- Министерот за внатрешни Ивица Дачиќ изјави дека безбедносните служби го следеле малолетникот поради сомневања за поврзаност со групата „Исламска држава“.
- Прогласувањето на „црвено“ ниво на терористичка закана подразбира зголемено присуство на вооружени полициски патроли на улиците, и засилено обезбедување на трговски центри, железнички и автобуски станици, аеродроми и дипломатски претставништва. На клучните локации низ земјата се спроведуваат построги контроли и претреси.
- Парламентарните избори во Израел завршија без јасен победник. Блокот на премиерот Бенјамин Нетанјаху освоил најмногу пратенички места во Кнесетот, но не и мнозинство што би му овозможило да формира влада.
- Партијата Ликуд на Нетанјаху освоила над 20% од гласовите и заедно со партнерите би добила 55 пратенички места. Опозицискиот блок на чело со Гади Ајзенкот има 49 места, според нецелосните резултати. Партиите на израелските Арапи ги освоиле преостанатите места, значително повеќе од досегашните 10.
- Излезноста на гласачите била 77,7% - највисоко ниво во последните речиси 30 години.
- Двата главни блока најавија дека нема да прават коалиција со арапските партии, но аналитичари не ја отфрлаат можноста Ајзенкот да се обиде да формира малцинска влада, која за клучните прашања би добивала поддршка од арапските партии во Кнесетот.
- Израелски коментатори шпекулираат за можноста за формирање влада на национално единство. Во таков случај, Нетанјаху би се откажал од своите сојузници од крајната десница и од ултраортодоксните партии, и би стапил во сојуз со Ајзенкот. Нетанјаху во 2020 година склучи сличен договор со опозицискиот лидер Бени Ганц, но нивната влада издржа само седум месеци.
- Во спротивно, Израелците ќе мора да одат на нови избори. Нетанјаху ќе остане премиер додека не биде избрана нова влада.
