Вести › Набрзинка

Апсења за криминали во РЕК Битола

9 октомври 2025

Вкупно 8 лица се осомничени во последната акција на Финансиската полиција и битолското Обвинителство.
Меѓу приведените покрај сопственикот на компанијата Марковски, Борче Марковски, осомничен и еден вработен во оваа приватна фирма.Останатите осомничени се дел од поранешното раководство (технички директори) на ЕСМ и РЕК Битола.
„Марковски компани ДООЕЛ“ од Битола е компанија која повеќе од две децении е активна во градежниот сектор, но стана најпозната по своите милионски договори со РЕК Битола. Марковски во јавноста е познат и како почесен конзул на Белорусија во Македонија.
Своевремено, на прес-конференција беше објавено дека омилената фирма на власта ќе заработува 63.000 евра дневно, со само 10 булдожери во РЕК Битола, пренесува Плус инфо.

извор

Србија има нафта до Нова година

9 октомври 2025

Американските санкции за српската нафтена индустрија НИС ќе имаат „исклучително сериозни“ економски и политички последици, оцени српскиот претседател Александар Вучиќ.
Согласно санкциите за енергетските компании што соработуваат со Русија, Министерството за финансии на САД ја блокираше лиценцата за оперативно работење на НИС, која е 45% во сопственост на рускиот гигант „Газпром“. НИС снабдува со гориво 80% од српскиот пазар.
„Прашање е дали ќе го добиеме последниот танкер со нафта. Рафинеријата може да работи до 1 ноември. Потоа почнуваат проблемите со дериватите. Во вкупните резерви имаме 342.000 тони дизел и над 66.000 тони бензин. Резерви на мазут има за најмалку 120 дена. Електростопанството има 57 милиони тони мазут за една година. Во топланите во некои места нема доволно, но ќе обезбедиме мазут. Што се однесува до горивото, нема да има проблеми до Нова година. Сите складишта се полни“, рече Вучиќ.
Хрватска изрази спремност да ја купи Нафтената индустрија на Србија за да ѝ обезбеди континуитет во работењето, изјави министерот за економија Анте Шушњар.
„Многу сум среќен што се заинтересирани за купување на НИС, што значи дека им е грижа за Србија. И ние сме заинтересирани за купување на Хрватската електроенергетска компанија. Ќе им ја дадеме најдобрата понуда во светот, 50% повеќе од кој било друг, одговори Вучиќ.

извор

Урсула преживеа, и тоа два пати

9 октомври 2025

Шефицата на Европската комисија преживеа уште две по ред гласања за недоверба во Европскиот парламент, со поддршка од мнозинството европратеници. Доверба ѝ беше изгласана и во јули, кога беше обвинета за аферата „Фајзергејт“.
Урсула фон дер Лајен се соочи со две иницијативи за недоверба. Во првата десничарскиот блок Патриоти за Европа ја обвини за лошите климатски политики на Европската комисија и за трговските договори со САД и со земјите од Меркосур. Се тврдеше дека договорите го загрозуваат земјоделството. Фон дер Лајен беше обвинета и за лошо управување со кризата со нелегалната миграција и за нетранспарентност. Оваа иницијатива ја поддржаа 179 пратеници, а 378 беа против.
Левицата исто така ги оспори трговските договори и нетранспарентноста. Нејзиното главно обвинување против Фон дер Лајен беше неуспехот да се справи и со климатската и со социјалната криза низ Европа, како и недејствувањето против бруталната израелска војна во Газа. Резултатот на ова гласање беше 133 „за“ и 383 „против“.
Стабилната поддршка од социјалистите и либералите се толкува како знак дека сите иницијативи за недоверба на Фон дер Лајен ќе бидат надгласани. Шпанскиот европратеник Хорхе Буксаде сепак предупреди дека „има толку многу причини за недоверба што би можело да има гласања на секои два месеца“.
И социјалдемократите ја предупредија шефицата на ЕК дека е крајно време да испорача резултати. „Ако за половина година не видиме ништо од ветувањата за приоритетите на социјалдемократите, ќе има нови критики“, изјави германскиот европратеник Рене Репаси.

извор