Равиоли со сите петки

Штовани аудиториуме, дали сте спремни да ја избербатите кујната од ,,глава до пети’’? Ако вашиот одговор е ,да’, вие сте на вистинското место. Но ова бербатење нема да е бесполезно и од чиста мира, туку по повод една вкусна мисија: домашни равиоли. И тоа домашни равиоли со сите петки. Континуирано одлични. А зошто се континуириано одлични, ќе откриете во продолжение од новата епизода на ,,Храна за возрасни’’.

И после овој џек-лалејн-пауер-џусер-ски вовед, на ред е малку посериозно да го најавиме денешниот деликатес. Равиолите се традиционална италијанска пастена варијанта. Секогаш се полнети со различни миксови и најчесто се сервираат со некаков сос. Името доаѓа од италијанскиот збор ‘рава’ што значи репка. У слободен превод, равиоли се мали репки. Репчички.

Денес многу ќе се експериментира. Така да, остајте си ја скепсата у подрум, ринглите на среден оган и идеме:

*Прво свежата паста:

200 грама сенаменско брашно и две јајца во сад. Во класичниот рецепт за домашна паста иде едно јајца на секои 100 грама брашно и најчесто се прави на рамна даска или маса, но поради хигиенски и трапави причини јас ги мешам во сад. Некои додаваат и плус жолчка за боја, но не мора. Со вилушка почнуваме да ги торнадоизираме јајцата како за омлет, притоа собирајќи од брашното.

Откако јајцата и брашното почнат да се соединуваат, преминуваме на рачно месење. Месиме едно 15-тина минути. Треба да добиеме мазна топка. Откако сме ја добиле, ја мотаме у најлонска фолија и у фрижидер едно пола саат.

*Миксот за полнење:

Тава на среден оган, внатре масло. Распаруваме 400 грама свински колбас. Ја тргаме кошуљицата, да остане само смесата внатре. Успат елиминираме еден кромид на ситно, и половина круша. Зашто круша? Затоа што најубавите круши свињите ги јадат. Башка дава одличен шмек во целата приказна. Запржуваме. После 5-6 минути додаваме 200 мл. бело винце и оставаме да се динста, без капак. Динстаме додека винцето не ни испари. На крај додаваме 4-5 ситно сецкани ливчиња свежа мента. Оставаме полнењето да се олади.

*Рикверц кај пастата:

Топката ја делиме на два еднакви дела. Малку набрашнуваме, и со сукало рокаме напред-назад, лево-десно, горе-доле и други реномирани стихови од Дино Мерлин. Сукаме додека не добиеме речиси проѕирна кора. Истото го повторуваме и со другата половина.

*Полнење:

Со супена лажица поставуваме конуси од нашето издинстано зајре. Радиус 1 сантиметар. Гледаме да има доволно простор до комшиската равиола, да не се испокараат околу една педа дворно место, како што тоа нормално бива. Откако полнењето е наредено, го покриваме со останатото парче свежа паста. Со рака притискаме околу обрачот на секоја равиола, за да се натапка смесата. На крај со чаша/филџан/шоља со остри рабови ги сепарираме равиолите. Парчињата паста што останале можете да ги чувате у фижидер за некоја наредна прилика или да ги замрзнете. Исто за некоја наредна прилика.

*Варење:

Во тенџере полно со засолена врела вода ги пропуштаме равиолите и ги вариме едно 5 минути. Свежата паста е побрзо готова, башка треба да се луксузира у џакузи полно со сос кој ќе го спремаме во следната подточка.

*Сос:

Во истата тава во која го динставме миксот, истураме една голтка вино, за да ги изгланца остатоците од претходното пржење. На многу тивок оган додаваме 70-тина грама горгонзола. Ако сакате сосот да остане бел, растопете го на екстремно тивок оган, ако го сакате искарамелизиран, малце појачете. Откако се десило растопение грешним, ги убацуваме равиолките и ги полеваме со растопената перверзија. Околу минута време.

И тоа е тоа. Сервираме, во чинијата додаваме уште малку од сосот, земаме прибор и се телепортираме на едно поубаво место, во некоја утопична паралелна трпезарија каде што времето не постои, луѓето плачат само од среќа, врне жолта лозова, членовите на Колдплеј мијат садови. Засекогаш!