Оние кои се форматираат во услови на систематска радијација од турските серии, веројатно се уверени дека нема ништо полошо од нив. Но затоа постојат постари релативизитари на кои, иако дамнешни, уште им се свежи раните од касандра, масандра и другите како-ли-беа јужноамерикански сапуници. Тек тоа, драга младино, како не се трпеше! Една мексиканска, поштено раскажана.

Исто како и до пеколот, и патот до денешните веб сајтови е поплочен со добри намери. Сè е тоа фино, приватност, доброволност, желба да се остане во контакт..... Ама дур дојдеш до некој сајт, да заборавиш зошто воопшто си тргнал таму.

Кај нас ова е каде-каде поинтересно. Шахтата се прави 5 дена. Во првите денови има знак дека се работи на патот ама потоа тој некако исчезнува па останува само празна канта пред дупката. Екипите работат по минимум два часа на ден. Двајца околу шахтата, тројца пушат на клупа, шефот им е во првиот кафич на кафе. И на крај, шахтата е направена, барем 10 сантима пониска од асфалтот, што е генијална иновација против случајно заспивање на возачите. Европо, дувај го!

Чујте го вие ова! 43 минутен добро скоцкан микс со говори и поенти од фамозниот Џордан Питерсон. Мешапот функционира толку добро (ма што добро, одлично!) што некогаш имате чувство дека ги слушате FSOL а некогаш Тhe Disposable Heroes of Hiphoprisy. Дали тоа е на повидок нов жанр? Селф хелп хоп?

Група Холанѓани од театарската трупа Ештон брадерс, во емисија на РТЛ ја изведуваат севдалинката „Јутрос ми је ружа процветала“. И не може а да не помислите како ли тек ќе звучеа ако и Зоран Маџиров им се придружеше.

Разгледајте вести, медиуми, мрежи, хистерии, човечки гадови и сподоби раширени по нив кои секојдневно го вадат најлошото од себе (притоа горди на тоа) и ќе ви стане јасно на кого типуваме.

Пајтоновци веројатно знаеја дека на стари години ќе имаат попаметна работа, на пример да пецаат риба, па се заебаваа со теми кои уште не беа стигнати на дневен ред. Ова е од 1979 година.

Нормално дека се единствен ваков клуб во земјата (а веројатно и пошироко), и како такви немаат ама баш никој со кого да се пробаат. Без разлика што дефицитот на противник им го средија само во име на реклама, пак е фино на некого да му направиш мерак.

Жена се враќа дома порано од работа и го наоѓа мажот во кујна, место на кое нему ниедна задача не му е претешка. И ете ти ја неа, одма да сними видео од тоа, да се пофали кај другарките. Блазе си им на тоа Русинките.

За да не ве малтретира, човеков авансно ви ја кажува поентата на неговиот ТЕД говор: ако имате мали деца држете ги што подалеку од Јутјуб. Ако ве интересира поопширно Џејмс Бридл има многу што да ви каже околу содржините што вашето дете го гледа на Јутјуб.

Бил Тексашанин во Далмација и баш му се бендисало како тоа изгледа. Еве го резултатот.

Помири се дека од старт немаш шанси и дека никогаш не си ни имал, едноставно целиот систем е направен да ги исцеди сите пари од тебе. И многу се профи во тоа.

Ова е проблем на сите потези во контактните спортови. Колку и да се навежба некој потег, доаѓа време кога тој треба вистински да се проба. А тоа не испаѓа секогаш како на генералната.

Апсолутно идентична ситуација имаме како и Холанѓаните. Штом се дојде до паричка се купува автомобил, по град веќе не се вози од закрченост со коли, ентузијасти промовираат возење точак, бензинот сè поскап, бројот на прегазени расте...  Само што кај нас е 2018, а кај нив 1975 година.

Иако нема ни М за Македонија, ни С за Северна, говорот на човекот од Г зборува за овдешните прилики, ментални матрици и малодушност. Од А до Ш.

Ќе понудиш да го преведуваш она што се зборува на пресот на јазикот на глувонемите. И после ќе си мафташ со раце фристајл. Барем на двајца во Америка финтата им има успеано.

Постојано преместување на производите (за човек да се помами и по други работи додека го бара она што му треба), членство, частенки, пакувања во големи количини (кому му требаат 5 кила морков?), се дел од триковите со кои американскиот Костко стана втор најголем трговски ланец на светот.

Словенечки хирурзи успеале на пациентка заболена од офанзивен рак на кожа, да ѝ одгледаат нов нос на нејзината подлактица а потоа да ѝ го пресадат на лице. За новиот дел користеле комплетно нејзин материјал и 3Д моделирање. Спојлер: во прилогот нема ништо за главната тема која нè тишти кога зборуваме за здравство: дали имаат ѓубре по клиниките.

Статиката на овалната соба едвај го издржа интелектуалниот габарит на последната средба. Кање одржа еден лудачки 10 минутен солилоквиј (нагалено: лупетање) додека Дамб гледаше со полна концентрација (нагалено: ко теле). Заебавајте се вие ама ќе дојде ден кога на некое кутро дете, комплетно спремно за Демостен, Черчил или Мартин Лутер Кинг, на час по историја ќе му се падне да одговара за „Говорот на Кање Вест во Белата куќа“. 

Што да прави жена кога змија ќе ѝ се оптегне на врата? Како што? Става ракавиците од Хулк и трга во бој.

На тест по математика, малиот напишал дека 2 плус 2 е еднакво на 22. Учителката пробува да му објасни дека операцијата собирање не значи спојување на бројките од задачата. И тука почнуваат компликациите. Кратко филмче во чест на сите даскали, напатени од системот, директорите, медиумите, а сè во име на нивното височество разгалените деца и единственото нешто што денес е бетер од нив, нивните родители.

Иако имаат бушави капи, иако веќе се станати неизбежен дел од идентитетот на Лондон и Британија, иако изгледаат малку смешно, клучно што не треба да се заборави околу британската кралска гарда е дека тоа сепак е гарда и како таква е составена од активни војници на британската војска.

Острата и секогаш незгодна Џенис Фиаменго (професорка од Отава, прокламирана анти-феминистка) ја распретува фамата околу новиот Кристина Блази Форд, жената која сведочеше против трамповиот предлог за врховен судија Брет (и тебе сам сит) Кавано. Вели, за да се разбере новата хероина на Хилари Клинтон, треба да се разбере културното милје од кое доаѓа и универзитетот на кој предава: елитниот Пало Алто (23.000 долари годишно), на чија скала на вредности, социјалната правда доаѓа пред квалитетниот научен труд.

Човеков има два проблема со целата приказна. Прво, тврдењето на аукциската куќа Сотби дека сликата е од човек кој лично ја добил од Банкси во 2006 и дека целиот механизам, сосе батерии, 12 години лежи така затворен. Втор проблем е поставеноста на ножевите на секачот за така да ја исечат сликата. Овие дупки во приказната важат само ако Банкси немал пристап до сликата од 2006-та до неодамнешната аукција и ако секачот од видеото навистина е употребен.