Вести › Набрзинка

12 години за наведување на самоубиство

7 May 2026

Стојанче Јовановски е осуден на дванаесет години затвор за смртта на неговите сопруга и ќерка Ивана и Катја.
Беше обвинет за загрозување на сигурноста, телесни повреди при семејно насилство и наведување на самоубиство на неговата сопруга Ивана која на 2 март се фрли од балкон заедно со нивната шестгодишна ќерка Катја.
Прогласен е за виновен за сите три кривични дела што му се ставаа на товар.
Во судската постапка е утврдено дека во периодот од 2023 до 2026 година, на повеќе локации во Скопје, како и во нивниот дом, обвинетиот сурово и нечовечно постапувал кон оштетената, која се наоѓала во материјална зависност од него. Ваквото континуирано насилство кај оштетената предизвикало тешка психичка вознемиреност и чувство на безизлезност. Како директна последица на тоа, таа извршила самоубиство, скокајќи од тераса заедно со нивната шестгодишна ќерка.
Одбраната тврдеше дека не е докажан каузалитетот ниту за кривичното дело загрозување на сигурноста ниту за делото наведување на самоубиство и помагање во самоубиство поради што побара обвинетиот да биде ослободен.

извор

Објавена „прошталната порака“ на Епстин

7 May 2026

Федерален судија во САД ја објави белешката за која се тврди дека како проштална порака своерачно ја напишал Џефри Епстин неколку недели пред да биде пронајден мртов во затворската ќелија во Њујорк пред седум години.
„Ме испитуваа со месеци – не најдоа ништо! Уживање е да можеш да избереш време за збогување... Не е забавно, не вреди!“, е запишано ракописно во белешката, чија автентичност ниту е потврдена ниту е негирана.

Белешката ја објавил судијата Кенет Карас по барање од весникот Њујорк тајмс, кој објави дека постои таков документ во судската архива во случајот на Николас Тартаљоне, цимерот на Епстин од ќелијата. Поранешниот полицаец Тартаљоне е осуден на четири последователни доживотни затворски казни поради четирикратно убиство во 2016 година.
Тој ја открил пораката во јули 2019 година, по наводниот обид за самоубиство на Епстин, кога беше пронајден со траги на вратот. Неколку недели подоцна Епстин беше пронајден мртов во ќелијата. Како официјална причина за смртта е наведено самоубиство.
Тартаљоне им ја предал белешката на своите адвокати, за да му послужи како одбрана од евентуални обвинувања дека го убил цимерот.

извор

САД и Иран се најблизу до договор откако почна војната?

6 May 2026

Белата куќа верува дека во следните 48 часа може со Иран да склучи „Меморандум за разбирање“ – документ од само една страница со кој војната би била прогласена за завршена и би била поставена рамка за понатамошни подетални преговори за нуклеарната програма на Техеран. Преговорите би се одржале во Исламабад или во Женева.
Меморандумот има 14 точки. Двете страни би се обврзале да ја укинат блокадата на транзитот низ Ормускиот теснец во период од 30 дена.
Иран би прогласил мораториум на збогатување ураниум во период што не е усогласен. Техеран предложил 5 години, а САД барале 20. Се очекува да се усогласат на 12 до 15 години. Од Иран се бара да прифати и засилен режим на инспекции на нуклеарните објекти, вклучително и ненајавени, од технички експерти на Обединетите нации.
САД, како дел од Меморандумот за разбирање, ќе се обврзат на постепено укинување на санкциите наметнати врз Иран и постепено ослободување на милијарди долари ирански средства кои се замрзнати низ целиот свет.
И претходно имаше оптимистички изјави дека САД и Иран се близу до договор, но напорите пропаднаа поради огромни разлики во ставовите. Анонимни пакистански посредници тврдат за Аксиос дека овој пат двете страни се најблизу до договор откако почна војната.
Веднаш по објавувањето на веста на Аксиос, цената на нафтата се спушти за 8% на околу 100 долари за барел.

извор