Вести › Набрзинка

Разрешен британскиот амбасадор во САД близок до Епстин

11 September 2025

Премиерот Кир Стармер го разреши британскиот амбасадор во САД, Питер Менделсон, поради блискоста со педофилот Џефри Епстин.
Форин офисот објасни дека Менделсон кога бил поставен за амбасадор не открил колку е широко и длабоко неговото пријателство со Епстин. Властите не знаеле за е-пораките од Менделсон до Епстин во кои ја оспорил и ја оценил како неправедна неговата пресуда од 2008 година за ангажирање деца за проституција.
„Сугестијата на Менделсон дека првата пресуда на Џефри Епстин била неправедна и треба да се оспори е нова информација. Имајќи ги предвид жртвите на злосторствата, амбасадорот е повлечен од функцијата со итен ефект“, соопшти претставник на Министерството за надворешни на Британија.
Неколку часа по објавувањето на пораките, Менделсон призна дека веројатно ќе се појават повеќе „многу срамни“ детали за неговото пријателство со Епстин, но инсистира дека никогаш не бил сведок на никаков прекршок.
Питер Менделсон е искусен британски дипломат, кој беше на разни министерски позиции во владините кабинети на лабуристичките премиери Тони Блер и Гордон Браун. За амбасадор во САД беше поставен од Стармер во февруари годинава.

извор

Словенија му забрани влез на Додик

11 September 2025

Словенија му забрани пристап на нејзина територија на претседателот на Република Српска, Милорад Додик, кој во Босна и Херцеговина е осуден на една година затвор и има шестгодишна забрана за вршење јавни функции. Тој отворено ги отфрла мерките и останува на функцијата.
„Мерката стапи на сила веднаш. Ако Додик се појави на граничен премин на Словенија, ќе биде вратен“, објасни вицепремиерот Матеј Арчон. Забраната не ги опфаќа членовите на неговото семејство.
Арчон додаде дека образложението за воведувањето на санкцијата е тајна поради чувствителноста на информациите. Иницијативата за забраната била од Агенцијата за разузнавање и безбедност (СОВА).
„Забраната за влез е важна симболична порака до европската и глобалната јавност, но и до широката мрежа помагачи на Додик во Словенија. Со други зборови, забраната го погоди шефот, но луѓето што кријат капитал за него во Словенија останаа недопрени“, изјави аналитичарот Зијад Бечировиќ. Неофицијално се смета дека Додик чува во Словенија околу 3 милијарди долари, но Дело тврди дека таа цифра е претерана.
Влез на своја територија на Додик досега му забранија и Австрија, Германија, Полска и Литванија поради „закани за мирот и европската интеграција на БиХ“.

извор

Од 12 октомври во ЕУ со отпечаток од прст и фотографија

11 September 2025

Граѓаните од Македонија и од други земји што имаат безвизен режим со ЕУ, од 12 октомври ќе треба да оставаат отпечатоци од прст и фотографија при влез во членки на Шенген зоната. Биометриските податоци ќе ги оставаат само при првиот влез, а при секој нареден само ќе им се потврдуваат податоците. Мерката нема да важи за деца до 12 години.
Регистрирањето ќе се спроведува во фази. Во првите 30 дена треба да бидат опфатени 10% од сите патници што влегуваат во Шенген, за 90 дена 35%, за 150 дена една половина, а по 170 дена се предвидува да бидат опфатени сите патници.
На копнените граници на Македонија со Грција и Бугарија на почетокот нема да се регистрираат сите патници, за да не се прави метеж. Патниците ќе мора да излегуваат од автомобилите, а за автобусите се размислува граничен службеник да влегува со мобилен апарат за земање отпечатоци.
„Сакаме да знаеме кој влегува и кој е во Шенген зоната, да се идентификуваат луѓето што влегуваат за да се намалат измамите со идентитет, но и да се намалат злоупотребите со пречекорување на 90-дневната дозвола за престој“, објави Делегацијата на ЕУ во Македонија.
Овој систем ќе функционира одвоено и паралелно со ЕТИАС, кој од крајот на 2026 година налага онлајн регистрирање за да се овласти патување во Европа во рок од три години. Цената на ваквата „дозвола“ за влез во ЕУ би чинела 20 евра, а ќе биде бесплатна за лицата под 18 години и над 70 години.

извор