Bookbox › Набрзинка

Прва „Зборотворба на годината“ - музика, зборови и награди

11 September 2025

Здружението Зборци ја организира првата „Зборотворба на годината“, настан посветен на македонскиот јазик, креативноста и уметноста кој ќе се одржи на 13 септември (сабота) со почеток во 19:00 часот, во дворот пред студентскиот дом „Гоце Делчев“ во Скопје.
Манифестацијата се одржува токму во годината кога Македонија ја прославува 80-годишнината од официјалната кодификација на македонскиот јазик. Така, „Зборотворба на годината“ претставува и симболичен роденденски подарок од Зборци за македонскиот јазик.
На настанот ќе бидат доделени три награди – за прво, второ и трето место во изборот за „Збор на годината“. На конкурсот беа пријавени повеќе од 400 зборови, а жири-комисија составена од професори, лектори, текстописци и поети ги одбра трите најкреативни. За крај, публиката на самата манифестација ќе го изгласа својот фаворит за „Збор на публиката“.
Настанот ќе започне во 19:00 часот со дискусија на тема „Македонскиот јазик – минато, сегашност и иднина“, на која панелисти ќе бидат Ѓорѓи Јолевски од Македонскиот народен театар, Тамара Ќупева од Институтот за македонска литература и Александра Гецовска од Институтот за македонски јазик.
По доделувањето на наградите, забавата ќе продолжи со настапите на МОЈРА, С.А.М, КЕМ и ДОУП КУЌАТА, млади и прогресивни македонски бендови кои ќе ја заокружат вечерта посветена на славење на нашиот јазик.

извор

Џармуш неочекувано со Златен лав во Венеција

7 September 2025

(фото: Epa Images)

Филмот на Џим Џармуш, минималистичкиот триптих за семејни приказни „Татко Мајка Сестра Брат“, неочекувано ја освои наградата „Златен лав“, и тоа пред насловите од конкуренцијата на кои се типуваше многу повеќе. „О, шит,“ рече изненадениот Џармуш кога ја прими наградата на сцена.
Наградата „Волпи куп“ за глума ја добија Тони Сервило за филмот на отворањето „Грација“ од Паоло Сорентино и Син Жилеј за „Сонцето изгрева за сите нас“ на Цаи Шангџун. Наградата за најдобар режисер ја доби Бени Сафди за филмот „Разорувачката машина“, кој ќе се прикаже во САД во октомври. Туниската режисерка Каутер Бен Ханија со драмата „Гласот на Хинд Раџаб“, која всушност беше фаворит, ја освои Големата награда на жирито, а филмот е и официјален кандидат на Тунис за Оскар за најдобар меѓународен филм.
Наградата за најдобар филм во „Оризонти“ ја доби мексиканскиот филм „По патот“ на Давид Паблос, додека за најдобар режисер беше прогласена Анупарна Рој за „Песни на заборавените дрвја“, која одржа емотивен говор во поддршка на Палестина.

Добитници:

Златен лав: „Татко Мајка Сестра Брат“ – Џим Џармуш

Сребрен лав – Голема награда на жирито: „Гласот на Хинд Раџаб“ – Каутер Бен Ханија

Сребрен лав за најдобар режисер: Бени Сафди – „Разорувачката машина“

Специјална награда на жирито: „Под облаците“ – Џанфранко Рози

Најдобро сценарио: „На дело“ – Валери Донзели и Жил Маршан

извор

Замина Илинденка Петрушева

5 September 2025

На 81 година, денес, 05.09.2025, почина Илинденка Петрушева, една од најзначајните филмски критичарки во земјава. Родена во 1944 година во Горна Џумаја, Бугарија, таа се школувала во Скопје и Загреб. Од 1972 година била уредник на филмската редакција во Домот на младите во Скопје (денес МКЦ).
Таа е еден од основачите на Кинотеката на Македонија во 1974 година. Таму работеше до периодот од февруари 1999 до август 2001 година, кога е назначена за советник на министерот за култура за кинематографска и драмска дејност. По тој период повторно се враќа во Кинотеката на Македонија, каде работи како советник-филмолог.
Во Кинотеката работеше на повеќе истражувачки проекти од историјата и теоријата на филмот во Македонија. Учествувала на повеќе научни симпозиуми од областа на филмот. Долги години била уредник на Кинотечен месечник, како и главен и одговорен уредник на списанието за историја и теорија на филмот „Кинопис“.
Од бројните нејзини книги, последната беше објавена во 2022-та – „Старите кина (киноприкажувањето во Македонија 1897-1954)“ (Букбокс осврт за неа тука).

извор