Bookbox › Набрзинка

Џармуш неочекувано со Златен лав во Венеција

7 септември 2025

(фото: Epa Images)

Филмот на Џим Џармуш, минималистичкиот триптих за семејни приказни „Татко Мајка Сестра Брат“, неочекувано ја освои наградата „Златен лав“, и тоа пред насловите од конкуренцијата на кои се типуваше многу повеќе. „О, шит,“ рече изненадениот Џармуш кога ја прими наградата на сцена.
Наградата „Волпи куп“ за глума ја добија Тони Сервило за филмот на отворањето „Грација“ од Паоло Сорентино и Син Жилеј за „Сонцето изгрева за сите нас“ на Цаи Шангџун. Наградата за најдобар режисер ја доби Бени Сафди за филмот „Разорувачката машина“, кој ќе се прикаже во САД во октомври. Туниската режисерка Каутер Бен Ханија со драмата „Гласот на Хинд Раџаб“, која всушност беше фаворит, ја освои Големата награда на жирито, а филмот е и официјален кандидат на Тунис за Оскар за најдобар меѓународен филм.
Наградата за најдобар филм во „Оризонти“ ја доби мексиканскиот филм „По патот“ на Давид Паблос, додека за најдобар режисер беше прогласена Анупарна Рој за „Песни на заборавените дрвја“, која одржа емотивен говор во поддршка на Палестина.

Добитници:

Златен лав: „Татко Мајка Сестра Брат“ – Џим Џармуш

Сребрен лав – Голема награда на жирито: „Гласот на Хинд Раџаб“ – Каутер Бен Ханија

Сребрен лав за најдобар режисер: Бени Сафди – „Разорувачката машина“

Специјална награда на жирито: „Под облаците“ – Џанфранко Рози

Најдобро сценарио: „На дело“ – Валери Донзели и Жил Маршан

извор

Почнува 47. издание на Фестивалот „Браќа Манаки“

19 септември 2026

Со проекцијата на македонскиот филм „Скејтањето не е за девојчиња“ на режисерката Дина Дума, вечерва почнува 47. издание на Интернационалниот фестивал на филмска камера (ИФФК) „Браќа Манаки“ во Битола. Свеченото отворање е денес, 19.09. од 20 часот во Центарот за култура. Ова е негова македонска премиера.
„Браќа Манаки“ ќе трае до 25 септември. Фестивалот ќе го затвори македонската премиера на дебито на Срѓан Јаниќијевиќ, „Нема да ви се верува што се случи претходно“, чиј кинематографер е Дејан Димески. На последниот ден (25.09., петок) ќе се одржи и мастерклас со режисерот Дарко Митревски на тема „Како да не направиш досаден филм?“.
Еден од главните гости и лауреати ќе биде американскиот кинематографер Џеф Кроненвет, долгогодишен соработник на режисерот Дејвид Финчер и директор на фотографија на филмовите „Боречки клуб“, „Друштвена мрежа“, „Исчезната“ и „Девојката со тетоважа на змеј“. Кроненвет ќе ја добие наградата Златна камера 300, заедно со претходно најавениот дански лауреат Дан Лаустсен.

Целата програма по денови тука

извор

Микрофестивал „Бостание“ - градинарство, уметност, дружење

18 септември 2026

Во општествената градина „Бостание“ во Скопје на 19 септември, од 14 до 23 часот, ќе се одржи годинашното издание на микрофестивалот „Бостание“, посветено на темата „Вкоренување“. Влезот е слободен за сите заинтересирани посетители.
Преку темата „Вкоренување“, фестивалот ќе ги истражува поврзаноста на луѓето со почвата, местото во кое живеат, заедницата, споделеното знаење и меѓусебните односи. Градината ќе биде претставена како простор во кој се преплетуваат здруженото градинарство, културата, уметноста, храната и музиката.
Во музичкиот дел ќе настапат дуото „Луна и Петар“, Мартин Џорлев, Елена Баклава и џез-квинтетот „Next to Silence“. Во изложбената и останатата фестивалска програма ќе учествуваат Иван Ивановски, Ивана Мирчевска, Ана Ивановска, Максим Наумовски, Зорица Зафировска, Владимир Лукаш и Јасмина Главинче. Нивните дела ќе бидат поставени во непосреден однос со просторот на градината, отворајќи прашања за поврзаноста на уметноста со природата, местото и заедничкото живеење.

Целата програма тука

извор