Вести › Набрзинка

Словачка блокира нови санкции од ЕУ за Русија

27 June 2025

Словачкиот премиер Роберт Фицо со правото на вето го блокираше новиот пакет санкции на Европската Унија за Русија, кој опфаќа постепено укинување на увозот на фосилни горива.
Индустриите на Словачка и на Унгарија зависат од гасот и нафтата што ги купуваат од Русија. „Газпром“ се заканува со тужба од 16 до 20 милијарди евра ако Словачка го прекине долгорочниот договор за увоз на гас.
„Прво мораме да го дефинираме решението за овој проблем, па дури потоа можеме да разговараме за санкции“, порача Фицо.
Лидерите на ЕУ на самитот не утврдија ни што да прават со прегледот на Договорот за асоцијација со Израел, во кој беа пронајдени „индикации“ дека Израел ги прекршил обврските за човекови права со своите дејствија во Газа и на Западниот Брег.

28 June 2025

На Славија во Белград денеска се одржаа масовни протести на кои повикаа „студентите во блокада“ на белградскиот Универзитет чие главно барање сега е да се распишат вонредни избори.

По завршувањето на официјалната програма на собирот на кој на собраните граѓани им се обратија неколкумина говорници, меѓу кои ректорот Владан Ѓокиќ, кошаркарската легенда Дејан Бодирога и други, дел од народот се разотиде но еден дел од луѓето се обидоа да дојдат до Пионерскиот парк кадешто се наоѓаат „студентите кои сакаат да учат“, при што дојде до вербални пресметки и кошкање со полицијата.

Денешниот Видовденски протест на кој власта беше „прогласена“ за нелегитимна, беше помалку посетен од импресивните протести на 15 март (види: Белград полн, преполн).
Претходно, токму од фамозниот Ќациленд, Александар Вучиќ порача дека студентите веќе победиле а блокадерите изгубиле.
И опозиционите кругови и Вучиќ најавуваа дека по завршувањето на протестот може да дојде до насилства.

Како и во сите слични острастени ситуации, најгласни се идиотите кои сите што нема да им се придружат, ги прогласуваат за непријатели.

28 June 2025

Украинскиот парламентарец ја повлече својата номинација на американскиот претседател за Нобелова награда за мир, која ја поднесе минатиот ноември.
Олександр Мережко, шеф на украинскиот парламентарен комитет за надворешни работи вели дека „изгубил секаков вид верба и надеж“ во Трамп и неговата способност да постигне договор за прекин на огнот меѓу Русија и Украина.
Нобеловата награда за мир одамна е комромитирана титула. Ја имаат добиено Хенри Кисинџер (види: (Донт) Кил Кисинџер) и Барак Обама, и тоа само неколку месеци по стапувањето на функцијата, без никакви конкретни постигнувања во мировните процеси