Некоја прастара пропаганда на Еднооки со која ширеле неоснована паника дека може да го смениме името, па пази богати, во Северна Македонија! Кај ли ги копале ваквите небулози, руска ли служба ги плаќала?! Мајку му, овде не може некој да се заебава толку колку што некој е спремен да не се заебава!

За Филип, Александар и цела таа фамилија нас нè боли уво точно колку за Ким, Кло и целиот клан Кардашијан. Ама кога со политички декрет некои ќе им се доделат на едни а забранат на други, декрет потпишан од двајца премиери од кои барем за едниот од прва рака знаеме колкав му е капацитетот за географско-историски прашања (тој за Прличев мислеше дека е од Велес), ти доаѓа од инает да ја рушиш новата идила.

Од нашиот највисок законодавен дом, во најфрагилните моменти на македонско-грчките односи, координаторот на пратеничката група на СДСМ неочекувано извика: „Македонија е една!“ (на крајот на излагањето додаде: „И една ќе биде!“). Или на тој човек ништо не му е јасно што деновиве се случува па на ауто-пилот го вергла она што го вергла, или пак си мисли, ако во оваа мала Македонија, за 9 месеци тој успеал да земе 9.454 евра евра за патни трошоци, како ли ќе му тргне живеачката кога на државен трошок ќе ја шпарта таа цела „една Македонија“!?

За мислата и синтаксата на Саше Фактор Икс ќе се заколневме дека е уникатна и неповторлива. Тој ќе ја ја пуштеше реченицата надвор од себе, да плови и да меандрира наоколу и сам не знаејќи каде таа го води. На тој начин се добиваа толку надреални реченични склопови што беше незамисливо тој семантички семенски материјал да се фати и да изрти и на друго место. Оф, каква заблуда.

На времето имаше маалски битанги кои по ќошиња начекуваа жртви и им продаваа цигла. Ќе те начекаат, ќе те опколат и ти нудат да ја купиш. Ти за да не јадеш ќотек, им даваш пари - а они тебе ти даваат цигла.