Исповед 5

Lingva Macedonica hic et nunc

Почитувани љубители на градинарството и градинарските култури! Во оваа прилика, воден од само мене познати мотиви, се решив... да ја споделам со Вас оваа листа... предноста е.. што може да ја проширувам и лицкам кога сакам, како сакам, и со што ќе ми текне...

Почитувани љубители на градинарството и градинарските култури. Во оваа прилика, воден од само мене познати мотиви, се решив, и верувам дека донесов исправна одлука, да ја споделам со Вас оваа листа. Таа малку шеташе по faciem liber (фб), но ова е дополнето издание, и содржи 70 нови единици. Со оглед на тоа дека јазикот е жива работа, и како таков подлежи на постојани промени, верувам оти ќе Ви биде од полза и Вам. Бидете модерни. Значи, насловот ѝ е:  

Современ превод на народни имиња и изрази со зборови и синтагми од новото ни време и новиот ни век


1. Бубрег во лој – нотар

2. мува не го лази – кулира

3. Славеј пиле – Ортопедски завод

4. Сокол пиле – градоначалник на Ѓорче

5. Домазет – има слика, нема тон

6. Лута змија – Што ја оженил некој постар и си остаил првата жена и децата

7. Биљбиљ пее по планина – В. Лозаноски отишол на Водно

8. Моме седи во градина – Есма си полева цвеќињата низ двор

9. Царштина - Империја

10. Малој моме – Ноне

11. Трчилаж – портпарол, адвокат, бизнисмен, уредник...

12. безобразник – сератор

13. млеко од биолица – млеко од „Виталиа"

14. чашка муабет – запивање

15. маанџија – критичар

16. здодевно - тапа

17. глупав, а, о – дунстер, тапа, ѓон, кокошка, морон

18. Црн Петко – 11-ти септември

19. гранапче – мини-маркет

20. кафанџија - угостител

21. од сите вери надвор – член на регулаторна комисија

22. ќелеш – пубертетлија

23. не се бели мори се црви – немој да одиш госпоѓо во бјути салон

24. изведува бесни глисти – импровизира

25. мечка игра оро – возрасна жена отишла на техно

26. со чисти раце – уште не го фатиле да краде

27. земјо моја – асфалту мој

28. родна грутка – болнички кревет на породилно

29. нива – руски џип

30. око соколово – микроскоп

31. глутница волци – мото-крос

32. дембел – инертен

33. сончоглед – опортунистичко растение

34. црна овца – неконформист

35. накриво моча – не ги задоволува стандардите на ЕК

36. милој либе – мила женска од Германија

37. празна слама – предизборни ветувања

38. од три страни сонце грее - Србија, Бугарија, Албанија

39. од четврта месечина - Хелас, јужен сосед

40. лаж и паралаж - западна дипломатија

41. јунак до јунака - плоштад Македонија

42. на ти чиче бонбонче - датум за преговори

43. Насрадин Оџа - специјален пратеник на ЕУ за Македонија

44. верна љуба - (фолклор, не постои)

45. роди бабо дете - ин витро, вештачко оплодување

46. летка - флаер

47. Мусо Кесеџија - ММФ и Светска Банка

48. човек-птица - параглајдерист

49. хатишериф - рамковен договор

50. пискотници се слушаат - штрајк, протести пред Влада

51. ни лук јал ни лук мирисал - немат макало

52. и волкот сит и овците на број - волците во зоолошка ги хранат со шницли од соја

53. глава-шиник - глава-телевизор(од старите, со катодна цевка)

54. брза коња - велосипед со алуминумска рамка, тркачки

55. бесна кобила - височка женска со штикли 12-ка, игра оро на свадба

56. муфљуз - кандидат за лустрација

57. образ да обели - да стави пудра

58. мајтапење - фолирање

59. не ме глеј вака, види ме на слика - билборд

60. зулумќар - криминалец, куче што краде кондури по комшии

61. кодош - лојален граѓанин кој само си ја врши должноста

62. неранимајко - син/ќерка што си го носи родителот во старски дом

63. скина конци - му снемало интернет

64. Луда Мара - откачена женска

65. ајвандоктор – ветеринар

66. белолице - депилирана

67. тенка става - анорексична

68. руси коси - бланширана

69. Мариовци - фолклор, не постои, потомците се прилепија Прилеп, Скопје...

70. врана коња - црн џип од новите

71. црна чума- СИДА, свински грип, ХПВ итн.

72. токмак – говорете македонски

73. Дете Голомеше - клошар

74. верни побратими – најбољи другари

75. аскер најсилен – НАТО

76. сретсело– центар, даунтаун

77. оро сретсело – техно-рејв забава

78. биљбиљ– канаринец

79. стар прч – успешен бизнисмен со втора жена

80. ороспија- втората жена

81. калаштура – можната трета жена

82. кмет- градоначалник

83. бакалница- Тинекс, Веро, Рамстор...

84. Болен Дојчин – рековалесцент

85. чифте – двоцевка, бисексуалец(-ка)

86. чифте амам – СПА центар, со сауна

87. еким - општ лекар

88. цар на векот - фриленсер што му оди

89. верни слуга - амбициозен член на политичка партија

90. турли,турли јадења - шведска маса

91. од пиле млеко - ол инклузив

92. газ преку глава – пивофест

93. камен пијан – пациент на токсикологија

94. чирак– приправник

95. пезевенк– консалтинг егзекјутив

96. бербер– стилист

97. берберина– женски фризер

98. гајтан вејџи – ластајца (на пр. Фрида Кало, заб.автор)

99. учен човек – Пиејџди

100. млади моми – матурантки

101. ергени– матуранти и студенти

102. млада невеста – девојка што се мажи пред 31

103. стара мома – немажена, а над 50

104. Павле Плетикоса - Дадар, Сергеј, Бушко (мошне вешт машки фризер од Автокоманда)

105. ептен учен човек – Доктор на втори постдокторски

106. влакно во јајце – нема ИСО стандарди

107. ќелеш– вработен во држ. администрација

108. свита– кабинет на министерот

109. стари коски – геријатрија

110. гемиџиja – терорист

111. стаорец– банкар

112. бела книга – дисплеј

113. црно писмо – тастатура

114. Итар Пејо – Лилјакот, Трендо, Миле Паника...

115. бело крпче – тоалет хартија

116. Црна Арапина – Бин Ладен, Осама; атлетичарот Рудиша

117. стари дедо – пензионер

118. Насрадин Оџа – претседател на Р Турција

119. Печалбари– Македонска дијаспора

120. Туѓина– прекуокеански земји

121. Туѓината пуста да остане – Не се враќам Кенада

122. Дуња Ѓузели – Мис на Македонија и Турција

123. Сирма војвода – Мирка Велиновска, Илинка Митрева, Г-ѓа Јагнула итн.

124. бела мачка не гледа – блекаут

125. кесеџија – инкасант

126. Женски Петко – метросексуалец

127. машкуданка – феминист

128. криви краставици - без добивка

129. секој петок урда јадеш - порно

130. Гол гас - Лукоил

131. Гола вода - тезата е неодржлива

132. Лук и вода - слаби аргументи

133. До гледање - Е, ај

134. Kрали Марко - Чак Норис

135. Ќелешот - Хомер Симпсон

136. Змија отровница - Ферхунде

137. коркач - фуфкаџија

138. мафта со опашот - кокета

139. Цар Тројан - мутант

140. Стојаноица - Стојанов

141. сабја-дамасклија  - грицкалица за нокти

 

И така натаму, и натаму така... предноста на градинарството, сфатено како широко поле за натпревар со самиот себе,  е тоа што листава може да си ја проширувам и лицкам кога сакам, како сакам, и со што ќе ми текне... така што... во најскоро време очекувајте таа да биде апдејтирана и ажурирана, впрочем. Е, ај. 

Тихомир

tihomirmail@yahoo.co.uk

 

 

18 април 2013 - 07:42