61 годишниот Елио Ди Рупо ја искористи можноста која ја нуди Фејсбук да се даде согласност за донирање органи и тоа да им се соопшти на пријателите. Освен во Белгија, ваквата опција засега им е достапна на корисниците во Канада, Данска, Ирска, САД и Велика Британија.
Во Белгија потоа лицата се препраќаат на соодветната страница на тамошното министерство за здравство за да пополнат образец кој потоа треба да им биде одобрен.
Тамошната регулатива е слична на македонската: за потенцијален донор по смртта се смета секој кој не се изјаснил спротивно додека бил жив. Проблем е што во пракса, пред земање на орган секогаш се консултира семејството а тоа некогаш не се согласува со постапката.
Со пријава на Фејсбук и одобрение од надлежната здравствена институција од земјата се отстрануваат таквите можни недоразбирања.
Марк Закерберг вели дека ја овозможил оваа опција по разговори со својата девојка која е студентка по медицина и со својот пријател Стив Џобс кој почина лани а пред некоја година му беше трансплантиран црн дроб.
