Националниот одбор за библиотеки им нуди на жителите на Сингапур виртуелни награди и симболични реални суми ако поминат низ предизвиците на новиот петгодишен проект ReadSG.
За да добијат 1 сингапурски долар (околу 80 центи), луѓето треба да се најават на најмалку 50 сесии на читање на платформата. Секоја сесија на читање подолга од 15 минути се наградува со 20 виртуелни монети. Кога ќе соберат 1.000, ќе може да ги разменат за 1 долар. Дозволена е по една сесија на читање дневно.
Корисниците можат да си постават лични цели, да водат евиденција за континуитетот во читањето за да добиваат повеќе поени.
Ако сакаме да влијаеме врз широк опсег од населението, од младите до највозрасните, треба да имаме трпение, бидејќи навиките се градат бавно. Пет години всушност не се долг период, но се надеваме дека на крајот ќе видиме промена во нашите навики, изјави претседателот Тарман Шанмугаратнам, покровител на проектот ReadSG.
Мелиса Там, директорка на Националната библиотека, изјави дека кампањата претставува обид да им се помогне на луѓето да стекнат вештини преку читање подолги текстови.
Содржините во кратка форма ни помагаат да останеме информирани, но читањето подолги текстови ја зајакнува способноста за фокусирање, критичкото размислување и имагинацијата. Сакаме да видиме нација од љубопитни и промислени читатели, со изострен суд и подготвени да се снајдат во свет што станува сè покомплексен, објаснува Там.
Владата разгледува разни начини за да ги заштити младите од прекумерното прелистување негативни вести на интернет (doomscrolling), вклучувајќи и дневни временски ограничувања за пристап до социјалните мрежи.
Претходно спроведе и други иницијативи насочени кон здравјето, како доделувањето ваучери за купување супермаркети како награда за пешачење. Учесниците во проектот Walking Trails можеа да добијат награди од 10 долари за пешачење меѓу две контролни точки во градот, оддалечени околу 5 километри, и уште 5 долари ако ги обиколат сите.
