Вашингтон се надева дека преку зголемување на економскиот притисок врз Иран ќе предизвика внатрешни немири, кои би ги принудиле иранските верски лидери да попуштат на барањата на САД за нуклеарната програма или пак би довеле до целосен колапс на власта во Техеран.
Економската болка што во моментов му се нанесува на Иран е исклучителна. Не ни се потребни воени напади ако можеме да ја постигнеме истата цел преку економски средства, изјави завчера државниот секретар Марко Рубио.
Сепак, Турција, Ирак и Пакистан се загрижени од долгорочни економски последици ако потклекнат под американскиот притисок да ги затворат своите гранични премини со Иран. Американски функционер изјавил за Њујорк тајмс дека трите земји стравуваат од проширување на граѓанското незадоволство, кое се појави поради американско-израелската агресија врз Иран. Постои и отпор против прекинувањето на шверцерските канали, кои се од витално значење за луѓето во пограничните региони.
Ирак не ги затворил двата гранични премини кон Иран, иако на тоа со недели инсистира регионалниот американски претставник Томас Барак. Еден премин бил привремено затворен како „знак на добра волја“ кон САД. Прашање е дали ирачките сили воопшто имаат капацитет да ја контролираат границата во должина од 1.600 километри. Ирак, исто така, од Иран задоволува една третина од потребите за гас, кој се користи за напојување на електричната мрежа.
Пакистан, кој одржува трговија со Иран во вредност од 3 милијарди долари годишно, во изминатите неколку месеци повремено затворал и отворал премини со Иран, наведувајќи „проблеми со новиот електронски систем за контрола на увозот“.
Турција упорно одбива да ја промени својата гранична политика.
САД во саботата ја објавија оперативната група „Железна порта“, чија цел е да го спречи Иран да се снабдува со оружје, воена технологија и забранети материјали преку копнените граници и Касписко Море. Копнените премини и северните поморски канали за трговија и шверц ја намалуваат ефикасноста на американската поморска блокада на југот, која го попречува транспортот на стоки до Иран преку Ормускиот теснец.
Операцијата „Железна порта“ ја води комбинирана единица од 20 воени офицери и цивилен персонал со штаб во Флорида. Оваа единица нема мандат да спроведува воени операции, туку треба да изврши притисок врз соседите на Иран со сопствени единици да наметнат копнена блокада.
