Даноне во тој период го финализира договорот за напуштање на Русија кога изненадно Кремљ прогласува дека руската филијала на Даноне, заедно со онаа на Карлсберг, е ставена под „привремен надворешен менаџмент.“
Наспроти наглиот старт на чеченскиот менаџмент сведоштвата што од таму ги пренесува Фајненшл тајмс покажуваат дека тие речиси ништо не промениле и само ја раководат компанијата на име, додека речиси целото претходно раководство и понатаму е вклучено во секојдневното управување.
ФТ пишува дека чеченските шефови „во основа ја водат компанијата како магистерска задача, прилично професионални и без непотребни инциденти“ што би се очекувале од нив, како мавтање со пиштоли и слично.
По документи прв човек на Даноне е Јакуб Закариев, 33-годишниот внук на Кадиров, меѓутоа Холанѓанецот Чарли Капети неофицијално ги исполнува најголемиот дел од задачите на генерален директор.
За сега во иста постава продолжува да работи и извршниот комитет на компанијата како и пред преземањето, а новото раководство се уште немаат отпуштено ниту еден од менаџерите што ги дочекаа на преземањето. Тие продолжуваат и со непречени контакти со централата.
Неколкуте нови менаџери кои ги дополнуваат постојните структури на Даноне, главно се држат на страна, и како што објаснува ФТ „тие првично изгледаат уплашени да не го расипат основниот бизнис на компанијата, бидејќи секое забавување на производството би било на штета на млекарите и продавачите.“
Едно од објаснувањата за ова е и што комплексноста на производството на млечни производи му дава предност на раководството на Даноне во однос на нивните нови шефови, бидејќи истото бара менаџирање на комплициран ланец на снабдување со бои, вкусови, ферменти и биопластика.
Во позадина централата и понатаму работи со Ротшилд за да ја комплетира формалната продажба на руската филијала, верувајќи дека сепак ќе може да најде купувач што ќе биде одобрен од Кремљ.
Даноне влегува во Русија брзо по падот на СССР, денес тој е најголемиот бизнис со млечни производи во Русија, а на Русија отпаѓаат 5% од годишните приходи на Даноне.
Во времето кога западните компании масовно почнаа да се повлекуваат од Русија по инвазијата на Украина, Даноне порача дека ќе остане затоа што има одговорност кон своите 7.000 локални вработени и млекари кои ја снабдуваа млекарата. Пред да заврши 2022, компанијата се предомисли и објави дека ја напушта Русија.
