Бричевите од еден долар купени за една милијарда

Во 2011 двајца дечки се наоѓаат на муабет колку непотребно скапи се бричевите на големите компании. И решаваат да ги реметат понудувајќи евтина алтернатива која ја стартуваат со едно ултра ефектно видео. Пет години подоцна, фирмата им ја купуваат за милијарда долари.

Гигантот Унилевер реши да одвои импресивни една милијарда долари за купување на компанијата Dollar Shave Club.

Марк Левин и Мајкл Дубин се среќаваат на журка и паѓа темата колку безобразно скапи се бричевите и доминантниот бизнис модел со евтини рачки и скапи патрони.

Собираат нешто инвестиции и го формираат Dollar Shave Club, сервис кој по пошта доставува квалитетни бричеви за бадијала пари (најевтиниот пакет е три долари и за нив добивате 5 брича со двоен жилет), бесплатна рачка и со секоја месечна достава носат и забавен магазин.

Стартот им беше фуриозен, најмногу благодарејќи на шармантното видео кое стана вирално и го преплави интернетот: сајтот им се скрши од посети но за 6 часа го продале цел лагер а за 48 часа добиле нови 12.000 нарачки.

"Дали нашите бричеви се добри? Не, тие се ебено одлични!" вели Дабин, еден од основачите, кој е главен лик во рекламата

Во меѓувреме компанијата го прошири асортиманот и со производи за нега на коса и тело (велат, одлични), добија тужба од гигантот Жилет дека им украле некаков дизајн, но купуванката од една милијарда ги покрива сите детали од оваа приказна.

Ваквите е-комерц стартапи обично се купуваат за еден или два нивни годишни приходи. Унилевер реши да одвои 5 пати повеќе отколку што Dollar Shave Club ќе продадат годинава.

21 јули 2016 - 00:45