30 октомври 2004, Лацио - Интер 1:1. Горан е во прв состав на 21 година и игра против Занети, Камбјасо, Станковиќ, Кордоба, негови идни поранешни соиграчи со кои ќе ја освои тројната круна. Во Интер е и Синиша Михајловиќ со тазе направениот трансфер од Лацио. Па уште и Давидс и Верон им се во состав. Какви времиња.

3 октомври 2007. Како вчера да беше кога ја гледавме на МТВ. Горан Пандев со два комада против Реал Мадрид, за делириум на Олимпико.

Холанѓанецот Тијани Нослин кој премина од Верона во Лацио, уште на старт покажа респект кон навивачите и покрај тоа што шоферот го напнуваше дека мора да тргнат. Фудбалот се игра за навивачите. Го знае тој тоа. Аплаузи доби за гестот.

Симболичен, ироничен, но вистинит и силен гест на навивачите, на планинското место Ауронцо ди Кадоре, каде Лацио ги почна подготовките за новата сезона.

Налетавме на видео од прославата на Скудетото на Лацио 2000-та. Многу јак клип со моќна нумера. Но ова е пред 24 години, од едни други славни денови на тимот од Рим, со поинакво сопствеништво предводено од господин Серџио Крањоти кој правеше рекордни трансфери во Европа.

На некои дијалози едноставно не е потребен звук за да сфатиме што се прави муабет.

Слушајте го ехото, почувствувајте ја атмосферата и гледајте ги фаците на терен. Свен Горан Ериксон vs Алберто Ѕакерони. Неста, Михајловиќ, Верон, Бокшиќ, Салас од едната, Малдини, Костакурта, Албертини, Шевченко, Веа од другата страна. 25 години поминало од оваа легендарна средба која заврши со спектакуларни 4:4. Како вчера да беше. Хет-трик на Шева. 65.000 на Олимпико.

Опта излезе со податок дека синоќешниот триумф на Лацио против Баерн им е само втор во нокаут фаза од Лига на шампиони. Да видиме кој е првиот.

Во Рим синоќа беше голем фудбалски празник кој лацијалите го прославија со 1:0 против големиот фаворит Баерн Минхен. Увертирата пред мечот беше нешто посебно. Легендарната „My Way“ од Френк Синатра со пејач на терен, но и со хор од 60.000 навивачи.

„Многу Италијанци мислат дека за Лацио навиваме поради Пандев, а ние им објаснуваме дека страста потекнува уште од времето на Крањоти, за кој имаме тазе анегдота и тоа во кафулето кое го посетува секоја недела, а во кое седевме ден после победата“.

Наполитанците се спремаат за историја. Лацио поведе во првиот дел против Интер на мечот од 12:30, резултат со кој ќе го одложеше огромното славје во Неапол, но Интер направи пресврт кој беше бурно поздравен од страна на навивачите на Наполи кои рокаа петарди на големо. Со триумф над Салернитана од 15 часот се и математични шампиони.

Италијанскиот фудбал е хит сезонава со претставници во нокаут фаза на сите европски натпреварувања. На крајот почнува да станува и забавно.

Поранешниот фудбалер на Киево и Лацио, Софијан Кијен кој моментално игра во Белгија, на вчерашниот датум треба да почне да направи слава.

Кога Симоне Инѕаги и Серџо Консеисаио синоќа се ракуваа на Меаца на мечот Интер - Порто од ЛШ, коментаторите веднаш констатираа дека тоа се двајца соиграчи од Лацио кои ја освоија последната титула во 2000-та.

Дербито меѓу Рома и Лацио во Рим важи за меч на сезоната кој со душа го чекаат навивачите. Лацио го доби со еден гол, кој играчите го овековечија на семафорот во соблекувалната.

По низа од неколку натпревари, Лучано Спалети одлучи да го седне на клупа Елиф Елмас, што сепак се покажа како добар рецепт. Македонскиот репрезентативец влезе, го освежи нападот на Наполитанците и по шест минути направи асистенција за водство.

Клаудио Лотито држи два клуба, Лацио и Салернитана, која инаку за 10 години од четврта ја избутка до прва лига, а потоа направи финта, како да не фигурира како газда на вторите. Во 2020-та „купи“ или поточно речено “прати“ еден анонимус од среден ред со сомнителни квалитети, од Лацио во Салернитана.

Не е Неста, ниту Михајловиќ, а најмалку Јап Стам, туку Патрик. Стопер на Лацио, светлосни години далеку по квалитет од многу негови претходници. На старт на натпревар во рок од 3 минути примаaт два гола од Наполи, а дрвцево му одзема топка на Инсиње и глуми Рамос. Цела Италија му се смее.

Викендов се играше Лацио - Јувентус, меч од кој на социјалните мрежи кружи фотографија за која штета што нема инфо. Барем да дознаевме од каде е ликов.

На последниот првенствен натпревар на Лацио против Интер, на дресовите на бјанкочелестите пишуваше „Binance“. Не е тоа компанија за производство на домати како што им беше едно време „Cirio“, туку спонзор кој ги внесува во новиот дигитален свет и во поблиска врска со навивачите.
 

Во големото римско дерби Лацио со 3:2 ја совлада Рома а бјанкочелестите знаеа да ја прослават победата. Тренерот Маурицио Сари ја сподели среќата со фамозната орлица - грб и симбол на фудбалскиот клуб Лацио на стадионот „Олимпико“.

По поразот од Милан, Лацио под водство на Сари бележи нов пораз, овој пат од Галатасарај со 1:0. Голот за 3 бода на домаќините им го подари Томас Стракоша, кој втора сезона му е замена на Пепе Реина. Трагикомедија, невидена и во романска четврта лига.

Тоа се тие градски ривалства во Италија, шеташ низ Рим и ако си почетник како Жозе, може лесно да го утнеш квартот или ресторанот. Но добро, сето ова излезе симпатично и од двете страни. Навивачот се пошегува, а Мурињо веројатно чекаше фотка и мислеше дека се работи за романист.

Најчудната сторија по завршувањето на рокот за трансфери се случи на релација Германија – Италија, а во игра биле српски репрезентативец и еден многу добро познат агент, кој инаку е роден во Македонија.