Потребни состојки:
- 120 гр брашно
- 1 лажица шеќер
- 2 лажички прашак за пециво
- 1 јајце матено
- 240 мл млеко
- 2 лажици зејтин
- 2 фино зрели банани
- сол
Мислам дека ја знаете онаа изрека “Работи го тоа што го сакаш и нема да работиш ден во животот“. Како што веќе ви кажав, почнав да готвам во ресторан, поточно во “Антигона“ кој е дел од “Македонско село“. Цел ден сум таму и сум пресреќна. Малце е зезнато што социјалниот живот ми е...немам! Но не се жалам, убаво ми е! Ми се лутат пријатели и роднини дека ме нема, дека ги заборавам, но се надевам дека ќе ми простат.
Овој рецепт излезе викендот пред ресторанот да се отвори официјално. Најчесто појадувам кафе и цигари, но кога ќе ми се пријаде сакам да јадам убаво. Ова се многу едноставни палачинки и можете да ги комбинирате со што ви душа сака. Јас ги искомбинирав со сè. Омлет, домат, шунка, кашкавал, но сето тоа на страна од нив. А да, јаворов сируп обавезно.
Чекори за подготовка:
- Во еден сад спојте ги сите суви состојки. Брашното, шеќерот, прашакот за пециво и прстофат сол. Промешајте ги убаво за да се соединат.
-
Во друг сад ставете ги сите течни состојки. Млекото, јајцето, зејтинот и бананата (изгмечена).
-
Садот со течни состојки префрлете го во оној со суви и со рачна маталка убаво измешајте.
-
Во тава за палачинки ставете малку путер да се растопи. Најбитното нешто, ригнлата да ви биде на пола температура. Дури и малку помалце. Ако имате обични со 1, 2 и 3, ставете ја на 1 ипол. Ако имате стакло керамика ставете ја на 4. Не е поентата да изгорат. А тоа ќе ви се случи ако ви е на многу јако. Палачинката треба да се сврти кога ќе приметите дупчиња на површината.
-
Кога ќе ја свртите треба да ви изгледа вака.
- Направете го цело тесто и послужете ги со што ви душа сака. Не го заборавајте јаворовиот сируп.
уживајте,
Софка
