Златко Калински и Дарко Панчев ги коментираа ЕП 2012 и СП 2014 и направија дар мар од коментатори во јавноста, па потоа ги бараа да се вратат во студио. Во подкастот Пресинг, легендарниот коментатор раскажува како се случила таа соработка со легендарниот напаѓач, за која уште се зборува. Панчев имал само еден услов.

По пауза од три децении, македонската фудбалска репрезентација до 21 година ќе одигра меч во Битола и тоа против Италија во квалификациите за ЕП. Билетите се распродадени, што значи на култниот стадион кој од пред неколку години е преименуван во „Петар Милошевски“, ќе има рекордни 8.587 гледачи. Мечот стартува денеска во 18:15. Битолчани конечно добија стадион каков што заслужуваат.

Откако забележа историска победа од 2-1 против силната Англија на Овен, Бекам, Ширер, Сол Кембел, Стив Мекманаман и другите, сјајните Романци предводени од Георге Хаџи, Попеску, Лакатуш, Адриан Илие и Мунтеану решија стие комплет да се бланшираат, да се офарбаат жолти. Така играа во следната фаза.

Во 5-от натпревар од квалификациите за Светско првенство, Македонија славеше убедливо 5-0 против отпишаниот Лихтенштајн. Во еден момент Езѓан Алиоски распали силен волеј после корнер и го погоди ривалот Хофер директно во лице. Фудбалерот на Лихтенштајн набрзо излезе од игра на полувреме и не се врати на теренот.

Хрватска ја доби Црна Гора 4-0 во натпревар од квалификациите за Светско првенство 2026 и е прва во групата. Овој натпревар повторно го одбележаа срамни скандирања од хрватските навивачи на сметка на Србите.

Најголемите тениски ѕвезди на денешнциата, Карлос Алкараз и Арина Сабаленка се прошетаа до пехарите на Отвореното првенство на САД. Стигнаа прилично убедливо до финале а и таму ги растурија своите ривали. Алкараз го победи Синер убедливо со 3-0 а Белорусинката ја совлада Анисимова со 2-0 во сетови. Во студио после финалињата, Сабаленка го помешала Алкараз со Синер.

Селекцијата на Мароко, која на минатиот Мундијал стигна до сензационално полуфинале, е првата африканска земја која обезбеди пласман на СП 2026. Го совладаа Нигер со 5:0. Исмаел Саибари сака да ви покаже нешто. Ова се става и не се трга од најавни шпици.

Европскиот првак Шпанија веќе има две победи од два натпревари во квалификациите за Светско првенство 2026. Шпанците ја демолираа Турција со 0-6 на гости во градот Коња, а после мечот ѕвездата на Барселона Ламин Јамал го пропуштил летот со своите соиграчи зошто го изгубил пасошот. Па реагирале сојузот и амбасадата и му средиле приватен авионски лет.

Хрватска без проблеми ја доби Црна Гора со 4:0 и со натпревар помалку е прва во својата група со 12 бода, исто колку што има Чешка. Деби гол на Кристијан Јакиќ на својот 12-ти репрезентативен настап. Фудбалерот на Аузбург измеша двајца, па го изненади голманот. Фиго знаеше вака, а еднаш и Турам има дадено ваков гол.

Турција пар години под водство на Винченцо Монтела важи за млада, полетна репрезентација со ѕвезди како Арда Ѓулер, Актуркоглу, Чаланоглу, Јилдиз и други. Ама сега за противник во градот Коња го имаа европскиот првак Шпанија која беше немилосрдна. Шпанците ја растурија Турција со 0-6. Два гола даде Педри, три за хет-трик даде Микел Мерино и еден Феран Торес. Ламин Јамал брилјираше.

Тајланд го пречека Ирак на пријателска и тешко дека пак ќе го пречека. Гостите победија 0:1 и добија два црвени картони. Вториот намерен и идиотски.

Џенаро Гатузо како селектор го има веројатно најефикасниот старт во историјата на Италија, со 10 гола на првите два меча во квалификациите за СП 2026. Ја совлада Естонија 5:0, а потоа Израел со 4:5. Гол за гол се играше на моменти, како во ракомет. Израел водеше 2:1, Италија го сврте мечот на 2:4, а потоа за 2 минути во 87` и 89` на семафорот стоеше 4:4. Точка на мечот Сандро Тонали во 91-ва минута.

Кога сме кај мундијалските квалификации, да потсетиме колку голем и моќен мајстор беше Ибра. Се работи за квалификации за СП 2006 меѓу Шведска и Унгарија. Погледнете колку малку му требаше да ја збуни цела одбрана. Голманот појма немаше каде е топката.

Македонија го совлада убедливо Лихтенштајн со 5:0 во 5. квалификациско коло за СП 2026. Елиф Елмас го постигна еден од најјаките голови во кариерата, ако не и најјак. Четворица му стоеа на патот и ги збриша сите до еден. УЕФА слепци, на голманот Бухел му го запишаа голот како автогол, бидејќи топката удри во него па влезе во гол.

Македонија успешно оди по новиот историски поход, кој се вика Светско првенство во САД 2026. Рутинска победа против Лихтенштајн на еден месец пред многу важното гостување против Белгија.

Најдобрата светска тенисерка Арина Сабаленка го освои Отвореното првенство на САД во тенис откако во големото финале ја совлада Американката Аманда Анисимова со 2-0 во сетови 6-3, 7-6. Дуелот се играше 94 минути а Сабаленка потврди дека е апсолутно најдобра светска тенисерка и го освои огромниот, рекорден награден паричен фонд.

Светскиот вицешампион и бронза од Олимписките игри, репрезентацијата на Србија уште во рана фаза, во осминафинале го заврши Европското првенство откако изгуби неочекувано од Финска 92-86. Освен Никола Јокиќ кој играше одлично во текот на целото Европско и синоќа постигна 33 поени со 8 скока и 3 асистенции, сите останати беа далеку под своето ниво. На другата страна Лаури Марканен од Јута Џез блесна со 29 поени и 8 асистенции, Микаел Јантунен постигна 15 поени, а по 13 имаа Миро Литл и Елиас Валтонен.

Сега ви е појасно зошто Андре Онана е претворен во голманиште? Погледнете му го начинот на загревање. Како мачка се фрла.

Рој Кин, Патрик Виера и Ерик Кантона на апарати. Исто и Гатузо, Стам, Ибрахимовиќ...Многу лошо.

Србија, Хрватска, Италија и Словенија во копродукција скоцкаа 80 минутен филм за неповторливата кошаркарска приказна од овие простори, за тоа како тимскиот дух и љубовта кон спортот можат да ги надминат сите граници. Се работи за уникатен момент, невиден во историјата на спортот, кога екстра силен и добро координиран тим, дава сè од себе за да победи на Европско, под знамето на земја која престанува да постои. За време на Евробаскетот во Рим 1991, додека во Југославија беснее граѓанска војна, последниот кошаркарски тим од таа земја се бори храбро за златниот медал.

Четвртфинале на Австралија опен, 21 јануари 2025-та. Тоа е последното соочување на двајцата ривали кои водеа многу силна битка во 4 сета. 16 години помладиот Шпанец повеќе со 1:0 и потоа изгледа не беше свесен што го снајде. Го извади ѕверското од Ѓоковиќ. Атомски тенис играа.

Лука Дончиќ влезе во врвна форма и во одличен ритам го игра Евробаскет 2025. Ги однесе Словенците во осминафинале а таму сега во недела ги чека Италија со харизматичниот селектор Поцеко. Лука во Рига се загреваше така што заби преку татко му Зоран Дончиќ.

Квалификации за Светско првенство 2026 се играат и во Африка. На дуелот меѓу Гвинеја Бисао и Сиера Леоне, гостинскиот капитен Кеј Камара кој има 41 година постигна велелепен гол со глава од дури 18 метри! Ова не се гледа секој ден. Домаќините потоа израмниле на 1-1 како што и завршил мечот.

Лео Меси го одигра последниот натпревар за Аргентина во Аргентина. ФИФА излезе со статистика остварена досега за селекцијата со која се искачи на кровот на светот. Што повеќе од ова?