Ако во 2020-та нова спортска историја во независна Македонија испиша четата на Мрме, оваа година тоа го стори Дејан Георгиевски.
22 годишникот од Бутел не замина во Токио како турист, туку спремен и сигурен дека на најголемиот спортски настан ќе освои медал.
Ветувањето го исполни и на градите се врати со сребро, откако на патот му застанаа Рафаел Јуниер Алба Кастилјо од Куба, Сајду Гбане од Брегот на Слоновата Коска и Кјо Дон Ин од Јужна Кореја.
Во финале се бореше против фаворитот од Русија Владислав Ларин на кој не му се предаде до крај, а да не заборавиме дека првиот противник кој го елиминираше, дојде како актуелен светски првак.
Георгиевски замина да се натпреварува како дебитант во спорт кој има многу слаб публицитет во Македонија, а потоа стана тема број 1. Срцата на македонската јавност трепереа на секој негов натпревар, а ги имаше вкупно четири со пренос на МТВ.
Ниту еден друг македонски спортист од независноста не ги почувствувал овие олимписки височи до кои стигна Георгиевски, а среќа му посака и легендарниот Шабан Трстена кој под знамето на Југославија стигна до златниот медал во борење во Лос Анџелес 1984.
27 јули 2021-та ќе остане датум на кој вечно ќе се сеќава Георгиевски, бидејќи успеа со сребрени букви да испише нова страница во спортската историја на Македонија и да стане прв Македонец што стигнал до едно олимписко финале.
Вториот олимписки медал за Македонија го дочекавме после дводецениско чекање. Првиот е на Могамед Ибрагимов во Сиднеј 2000 кога освои бронза во борење.
