Парови на Фајнал Фор од Лигата на шампионите:
БАРСА ЛАСА - ВАРДАР
ВЕСПРЕМ - КИЕЛЦЕ
Полуфиналните дуели се закажани за 1 јуни (сабота) а големото финале е на 2 јуни (недела).
По трет пат во својата клупска историја, Вардар ќе игра на турнирот на четирите најдобри на континентот. Што се однесува до ривалите: Барселона, Веспрем и Киелце, „црвено-црните“ со секој од нив имал меѓусебни дуели, дали во групната фаза, дали во нокаут рундите.
Сезонава сите овие четири клуба играа меѓу себе во групата А каде Скопјани имаа 2 порази од Барса, по славје и пораз со Кјелце и Веспрем.
Севкупно, против Барселона, македонскиот шампион има 6 порази, 2 победи и 1 реми. Најдрагоцена победа против Каталонците Вардар забележа на култниот Ф4 2016/2017 кога ги совлада во полуфиналето на патот до златото.
Против унгарскиот гигант Веспрем Вардар има 1 победа и 1 реми со 4 порази, а со полски Киелце 3 победи и 5 порази.
Необичен факт е што во Келн каде Вардар беше крунисан за европски владетел пред 2 години, сега сите четворица тренери ќе бидат Шпанци (Парондо/Вардар, Давид Дејвис/Веспрем, Талант Душебаев/Кјелце и Чави Пасквал/Барселона).
Блауграна по рекорден седми пат ќе зачекори на Фајнал Форот и тоа е најмногу од сите останати клубови во Европа. Веспрем по петти пат ќе се бори за највредниот трофеј, полски Киелце четири пати а Вардар по трет пат е на Ф4.
Токму Барселона е најтрофејниот клуб во Лигата на шампионите со дури 9 освоени титули, а германскиот Гумберзбах има пет пехари.
