Во првата четвртина двете екипи одиграа израмнето со „кош за кош" игра и по крајот на првиот период резултатот гласеше 21:21.
Кошаркарите на Сиена имаа подобар старт на втората четвртина и поведоа со +5 (28:33), а на паузата помеѓу двете полувремиња гостите заминаа со минимална предност од 38:39.
Гостинските кошаркари го одржуваа минималното водство и во второто полувреме, а пред крајот на третата четвртина повторно поведоа со +5 (50:55), но со серија од 11:0 и тројката на Перо Антиќ, Олимпијакос дојде до водство од 61:55 на стартот од последната четвртина.
На 5 минути до крајот Сиена со серија од 6:0 израмни на 61:61, но домашните кошаркари веднаш возвратија со серија од 8:0 и поведоа со 69:61.
Во последните 3 минути Олимпијакос рутински ја задржа предноста и на крајот прослави победа од 76:69, со што грчкиот тим со вкупен резултат од 3:1 ја совлада екипата на Монтепаски Сиена и обезбеди пласман на фајналфор турнирот.
Перо Антиќ одигра 15 минути за кои повторно прикажа одлична игра во одбраната. Тој натпреварот го заврши со 5 поени, 5 скокови и 1 асистенција.
За разлика од минатите натпревари, македонскиот репрезентативец Лестер Бо Мекејлеб имаше лош реализаторски ден и постигна само 10 поени.
Фајналфор турнирот на кошаркарската Евролига ќе се одржи од 11 до 13 мај во Истанбул. Покрај Олимпијакос, на фајналфорот пласман обезбедија и екипите на Барселона и ЦСКА Москва, а последниот патник ќе биде познат по одигрувањето на мајсторката помеѓу Панатинаикос и Макаби.
