Олимпијакос имаше одличен старт на натпреварот и поведе со 8:0 со тројките на Спанулис и Манцарис и положувањето на Антиќ. Барселона се врати во игра и намали, а по првата четвртина Олимпијакос водеше со 17:11.
Екипата на Олимпијакос се задржа во водство се до четири минути пред крајот на полувремето кога Барселона израмни, а следната минути тие за прв пат дојдоа и до водство (26:27). Но нивното водство траеше само неколку секунди, па на паузата Олимпијакос замина со предност од 33:29.
Кошаркарите од Атина го одржуваа водството, но Барселона не дозволи тие премногу да се одвојат и во последната четвртина се влезе со предност на Олимпијакос од 50:47.
Во последниот период се играше „кош за кош", а клучна беше тројката на Принтезис на три и пол минути до крајот по што Олимпијакос се одвои на +7 (63:56). На една минута ди крајот Барселона намали на 63:61, но тоа беше се што тие сторија и Олимпијакос на крајот славеше со 68:64.
Најефикасни кај Олимпијакос беа Спанулис со 21 и Принтезис со 14 поени, а Наваро со 16 поени беше единствен на висината на задачата во редовите на Барселона.
Перо Антиќ одигра 18 минути за кои имаше учинок од 4 поени, 2 скока и 1 блокада, но тој беше клучната алка во одбраната на Олимпијакос и една од причините што Барселона постигна само 64 поени.
Во финалето на фајнал-фор турнирот на кошаркарската Евролига, екипата на Олимпијакос во недела во 20 часот ќе се сретне со ЦСКА Москва откако на првото полуфинале тие го совладаа Панатинаикос.
