Свири химната на Лига на шампиони, сите мирно стојат, само не се знае кој е поголемо дете, дали оние кои стојат покрај играчите или капитенот на Јувентус.

Со учинок од 3 нерешени, 3 порази и 12 примени гола, во конкуренција на ПСЖ, Реал Мадрид и Галатасарај, белгискиот шампион заврши трет и ќе продолжи на пролет во Лига Европа.

Која е поентата на ВАР ако за ова нема црвен картон, искоментира поранешниот фудбалер на Манчестер Јунајтед, Овен Харгривс во улога на фудбалски аналитичар на британска тв. И во право е, за ваков намерен фаул секогаш се дава црвен.

Со головите на Кристијано Роналдо и Гонзало Игуаин, Јувентус го совлада Баер во Леверкузен и сега ја чека ждрепката за противникот во осминафиналето. А на крајот од мечот, еден натрапник сакаше да направи селфи со Португалецот, кој обично е пристоен со тие што упаѓаат, ама овојпат со право не беше.

Сене Ламенс е херој на колото во младинската Лига на шампиони. Неговиот клуб губеше 1-2 од Реал Мадрид У19, за Ламенс во 90+5’ минута да даде прекрасен гол со глава и да обезбеди бод. Младинците на Клуб Бриж имаат 10 бода и како втори во групата одат понатаму.

ПСЖ ја затвори групната фаза со тоа што го нокаутираше турски Галатасарај со 5:0. На петтиот гол му претходеше интересен момент, многу поинаков од оној каков што имаа Кавани и Нејмар пред некое време.

Го пратите ли 19 годишното крило на Баерн Минхен, Алфонсо Дејвис? Ако не можете пуштите го на забавена снимка, бидејќи вака е тешко. Баерн има сигурен пласман во ЛШ, плус 3:1 против Тотенхем, а он му се сипа на Сон како да ќе нема утре. Каков е овој трк?

Остај што тоа му е стил од кој не се откажува и што е ризик, туку тој кога ќе ја фати, сериoзно сака да тргне што понапред и да организира напад. Погледне синоќа што произлезе од неговата акција.

Никогаш немаат освоено меѓународен трофеј, никогаш немаат освоено Скудето, никогаш претходно не играле во Лига на шампиони, а од ноќеска се во исто друштво со Реал, Баерн, Барса, Ливерпул и останатата европска елита. Бергамо е град со само 120.000 жители.

Шест натпревари - 18 голови на вечерашните средби од 21 часот во ЛШ. Атлетико Мадрид оствари очекувана победа за осминафинале, Баерн го доби дербито на вечерта против Мурињо, а Црвена Звезда остана без ЛЕ во 88-ма минута, откако претходно утна пенал.

Со атрактивниот волеј на Даниел Олмо, Динамо по само 10 минути имаше надежен резултат за сензација против Сити, но потоа доживеа дебакл поради расположениот Габриел Жезуз кој оствари хет-трик. Во топ 16 патува и Аталанта и тоа во својата деби сезона во ЛШ.

Односот меѓу трофејниот тренер и првиот човек на Наполи веќе некое време не биле баш најсјајни. Немале никакви конфронтации, освен што Де Лаурентис веќе подолго време сакал еден друг стратег да ги води „Аѕурите“ од Неапол.

Низ италијанските медиуми се појавија муабети дека дел од фудбалерите на Наполи плачеле поради заминување на Карло Анчелоти, што е и за очекување кога ќе размислиш дека имаа привилегија да ги води искусен лисец со три освоени титули во ЛШ.

Салцбург синоќа го загуби дуелот вреден осминафинале во ЛШ, ама за овој резервен играч на австрискиот тим не беше крај на светот. Не е секој ден Велигден европскиот првак да ти дојде на гости, па дојди Мане да се сликнеме за спомен.

Иако беше апсолутно во право за замерката (многу преведувачи не познаваат фудбалска/спортска терминологија па буквално преведуваат на прес-конференциите), Јирген Клоп како прав џентлмен му се извини на преведувачот за тоа што јавно пред сите отворено го критикуваше пред мечот Салцбург - Ливерпул кој заврши 0:2.

Наполи синоќа првпат после 3 години ја мина групната фаза во Лига на шампиони и се пласираше во 1/8 финале, а за тоа му требаше поддршка од градот. Еден доктор ја затворил ординацијата за да оди на фудбал.

Ќе речат голманот во ракомет е пола тим, ама таа теза држи многу вода и во фудбал, особено во едно натпреварување како Лига на шампиони каде нијанси знаат да одлучуваат. Со Алисон Бекер на голот немаш зима. Дечкото е маестрален и сезонава, а два и пол месеци беше повреден.

Иако реши да игра за земјата во која е роден (Шведска, Стокхолм), 19-годишниот Дејан Кулушевски кој во моментов важи за еден од најдобрите играчи во Серија А и кој е на радар на големите клубови, не заборава на своите корени.

Во групата Г синоќа беше многу лудо. Дури три екипи имаа шанси за пласман понатаму и секој еден гол ја менуваше состојбата во групата. На крај најзадоволен Лион чии навивачи направија инцидент со своите играчи.

Со само 17 години и 287 дена, голманот на Генк, Мартен Вандевордт стана најмладиот чувар на мрежата на натпревар од Лига на шампиони. Направи пар киксови, ама добро, така се учи и се станува врвен голман.

Што год да се случи, голманот на Дортмунд Роман Бурки не отстапува од својот чуден ритуал - да ја земе топката од кај судиите, онаа со која треба да се игра мечот, иако околу него има 100 други топки од двата тима. Што ли му е ова, дали суеверие дали нешто стварно верува којзнае.

Немаше синоќа некој еврогол во Лига на шампиони, ама затоа го имаше Мохамед Салах кој покажа колку немилосрден финиш има од позиција од каде не е баш нормално да се погоди.

Беше критикуван дека е дебел па се тегнеше на позајмици во разни средини како КПР, Фулам, Милан, Џенова, ама ете го сега стандарден и стабилен во Бенфика каде ја импресионира УЕФА за да му го прогласи ова за потег на денот. Адел Тарабт од Мароко со финта како на маалски турнир.

Со нив беше три сезони, со нив се прослави, со нив освои титула, со нив стигна до полуфинале во ЛШ и од кај нив го направи можеби трансферот на кариерата во Барселона за 75 милиони евра. Затоа е оваа искрена емоција спрема своите.