Прво европско злато за Шпанија на чело со извонредниот Штербик

По четири сребрени медали и две бронзи, двократниот светски првак за прв пат во својата историја освои Европско првенство. Херојот на Вардар, Арпад Штербик вечерва беше херој и за Црвената Фурија.

Шпанија е нов европски првак откако на вечерашното финале на ЕП 2018 во Хрватска ја совлада убедливо Шведска со 29:23.

Клучен човек за освојувањето на нивното прво европско злато беше Арпад Штербик кој влезе при крај на првиот дел и во вторите 30 минути блесна со 8 интервенции.

Шпанците имаа негатива на паузата (12-14), но во вториот дел одбраните на чуварот на голот на Вардар ги наградија со фантастична серија од 11:2 за целосен пресврт.

Шведска беше очајна во второ полувреме, имаше многу загубени топки и постигна само 9 голови, а прими 17.

Најпрецизни во таборот на шампионот беа Балагуер и Соле со по 5 погодоци, а Душебаев, Ентрериос и Арино постигнаа по 4.

Со овој триумф Шпанија обезбеди директно учество на Светското првенство во 2019 година во Данска и во Германија.