Значи. Излегуваат обични палети. Излегуваат тематски. Палета во форма на еднорог. Палета инспирирана од Хари Потер. Од сирени. Уште еднорози. Уште малце еднорози. Палети и цели колекции шминки инспирирани од - кујна (значи, прејаки, со брашното е божем пудра, чоколадото за готвење е божем за контурирање, значи секоја чест). Па уметници и забавувачи од секоја можна сфера се фаќаат за правење своја колекција. Утре ако го сретнете комшијата во пошта како плаќа сметки, може и да дознаете дека баш се маткал со сопствена линија шминки.
Значи, се разбравме - кој стигна, направи шминки, и шуто и рогато, и способно и неспособно, во сите форми и варијанти, и се покрија сите нијанси што сме ги виделе и не сме ги виделе во природата.
И ќе си рече човек, толку, све се измисли.
Е, не се измисли.
Затоа што до скоро ја немаше палетата инспирирана од ПИЦА.
Некои блесави, решиле дека колку и да е тешко да понудиш ново во било која индустрија, има да се најде начин и точка.
Резултат: цврсто пакување во форма на кутија за пица, од оние во кои што ни ги носат до врата, шарено, сјајно, скапо, сè што треба. И внатре, округло пакување, слика од пица, величина - мала - од оние што обично ги спомнуваме при „требаше да нарачам мала, сега ќе умрам,” и внатре - сенки за очи. Овде, пригодно наречени „додатоци”, од оние што кај нас чинат по 20 денари плус. Значи нијанса „пеперони”, нијанса „екстра кашкавал” и такви работи. Многу јако.
Брендот е „Гламлајт”, палетата е 40 долари, ама сега е распродадена.
И пакетот од надвор изгледа топ, дали е формулата добра?
Тоа проверува Џефри Стар, таман да видите како изгледа.
Спојлер: многу, многу добри сенки.
Се нарачува преку сајтот на Гламлајт и со испорака е вкупно 54 долари. Моментално нема, ама има pre-order. Пробајте, па кажете.
