Значи не била ни забар, ни хирург, ни астронаут, ниту била играчка за мали девојчиња. За големи чичковци била.
Барби почнува во доцните 1940-ти како лик од германски стрип што го црта Рајнхард Бојтиен за хамбуршкиот таблоид Билд-Цајтунг. Ликот бил познат како Билд Лили, повоена спонзоруша која се снаоѓала заведувајќи богати мажи. Била итра и не трпела машки авторитет - во еден стрип, полицаец ја предупредува дека нелегално носи бикини на тротоар, а таа го прашува: „А според тебе, кој дел треба да го извадам?“
Станала толку популарна што во 1953, весникот решил да рекламира тридимензионална верзија што се продавала како играчка за возрасни, а се купувала во барови, трафики и секс-шопови. Често се давале на шега на ергенски вечери и виселе од ретровизори.
Родителите сметале дека е неприкладна за деца и германска брошура од 1950-те ја опишува како „секогаш дискретна“, а со нејзината импресивна гардероба - „ѕвезда во секој бар“. И навистина имала широк дијапазон на облека и додатоци што можеле да се купат, па со тек на време и девојчиња посакале да ја имаат за играње.
Во тоа време, една од основачите на Мател, Рут Хендлер, патувала низ Европа и купила неколку Лили кукли за дома. Го преработила дизајнот и ја дебитирала како Барби на еден саем за играчки во Њујорк на 9 март, 1959. Мател ги откупува правата за Билд Лили во 1964 и тука престанува да се произведува германската кукла.
Остатокот од историјата е веќе попознат, а и сигурно на Мател им е попријатен за раскажување.