Оваа година, интернетот очекувано експлодира: ТикТок е преплавен со Wrapped видеа, мемиња и признанија, од луѓе што гордо глумат музички авангардисти, до родители што болно откриваат дека им се појавило нешто со наслов Baby Shark Remix. Хаштагот #SpotifyWrapped минатата година собра над 73 милијарди прегледи.
Што го прави Wrapped толку успешен? Според една истражувачка од областа на маркетингот, Ишани Банерџи од Универзитетот Клемсон, одговорот лежи во една стара психолошка идеја: теоријата на оптимална различност. Таа вели дека постојано се движиме меѓу две спротивставени желби - да припаѓаме и да се издвојуваме. Wrapped е токму на таа тенка граница: доволно е заеднички за сите да се препознаеме во него, но доволно специфичен за да ни даде нешто „само наше“.
Поточно, убаво е кога ќе откриете дека вие и пола од луѓето што ги знаете сте го слушале истиот изведувач во исто време. Но уште поубаво е кога ќе се појави некоја бизарна, сосема лична песна што ја знаете само вие (или вашето дете). Тоа е мини-знак дека си дел од групата, но сепак остануваш - барем музички - индивидуалец.
Во меѓувреме, брендовите со право завидуваат. Слични „year-in-review“ формати веќе имаат Епл Мјузик, Редит, Убер, Дуолинго, но никој не ја достигнува истата културна тежина. Wrapped не е само статистика, туку дигитално огледало, спакувано во боите и графиките што брендот би сакал да ги споделите за него.
