Вести › Набрзинка

Златна картичка од милион долари за државјанство на САД

11 декември 2025

Белата куќа промовира нова шема за итно стекнување американско државјанство за странци што ќе платат 1 милион долари за златна картичка со ликот на Доналд Трамп. „Златната картичка отвора директен пат до државјанство за сите што ќе ги исполнат условите и проверките“, објави Трамп.

Картичката може да ја добијат сите странски државјани што ќе покажат дека ќе бидат од значителна корист за САД. Аплицирањето чини 15.000 долари, а по одобрувањето треба да се уплатат уште 1 милион.
Наскоро ќе биде претставена и „платинеста“ картичка од 5 милиони долари, која нуди и специјални ослободувања од даноци. „Тие што можат да платат 5 милиони се луѓе што создаваат нови работни места. Тоа е добра зделка“, изјави Трамп.
Претседателот во септември воведе такса од 100.000 долари за апликантите за виза од програмата H-1B, која се однесува за висококвалификувани работници.
Во меѓувреме САД забранија издавање визи за државјани на 19 земји и најавија дека ќе ги преразгледаат сите одобренија за азил што ги дала претходната администрација на Џо Бајден.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор