Вести › Набрзинка

Жестоки улични судири низ Србија

14 август 2025

Десетици граѓани и полицајци се повредени во масовните и жестоки пресметки помеѓу демонстрантите и приврзаниците на власта во Нови Сад, Белград и во десетина други градови низ Србија.
Најжестоко било во Нови Сад, каде што група „блокадери“ го опколила штабот на владејачката СНС. Маскирани хулигани врз нив фрлале факели и петарди, по што почнал општ хаос.

Штабот на СНС бил уништен. Според претседателот Александар Вучиќ, биле повредени 16 полицајци и 60 граѓани. „Тие буквално пливаа во крв“, изјави Вучиќ.

Во Белград полицијата и жандармеријата употребила солзавец за да ги запре демонстрантите што тргнале кон кампот на лојалистите на Вучиќ. Демонстрации имало и во Краљево, каде што полицијата спречила директни судири на двете групи, во Ниш, Чачак и Крагуевац. Нема информации за повредени лица.
Опозицијата ги осуди насилствата и ја обвини полицијата дека била пасивна кон групите маскирани хулигани што ги напаѓале и ги провоцирале демонстрантите. СНС одговори дека демонстрациите се обид на опозицијата и на „странските центри на моќ“ да ја дестабилизираат државата. Претседателот Вучиќ изјави дека нема намера да ја ангажира војската да интервенира и дека нема да има граѓанска војна.

извор

САД ќе дозволат повисоки дози на зрачење од нуклеарните централи

3 јули 2026

Американските регулатори предложија разлабавување на стандардите за безбедност од зрачење на нуклеарните реактори за да се олесни и забрза изградбата на нови атомски централи.
Ќе се укине стандардот за заштита „Најниско разумно остварливо ниво“ ALARA, кој е линеарен и нема дефинирани прагови, врз основа на претпоставката дека „секоја доза на зрачење, без разлика колку е мала, носи ризици од развој на рак“. Придржувањето до стандардите ALARA е енормно скапо, зголемувајќи ја цената на изградбата и работа на реакторите за милијарди долари.
Операторите на нуклеарните централи ќе добијат поголема флексибилност да поставуваат прагови на дозволените дози на зрачење за работниците и околината, врз основа на специфичните околности и новите технологии.
Предложените измени се во согласност со наредбата на Доналд Трамп за четирикратно зголемување на американскиот капацитет за генерирање нуклеарна енергија од околу 100 гигавати во 2024 година на 400 гигавати во 2050 година.

извор

Заради пијани туристи, Сплит забранува ноќно продавање алкохол

3 јули 2026

Повраќање по улици, уринирање на јавни места, спиење по влезови, тепачки и гласно викање до раните утрински часови се неизбежен летен декор на популарните туристички дестинации како што е Сплит.
Градот ќе проба да стави крај на ова со забрана за продажба на алкохолни пијалоци во продавниците од 21 часот до 6 часот наутро.
Во јуни Брзата помош интервенирала во 50-тина случаи на алкохолизирани на јавни места, повеќе од нив млади туристи од странство.
„Ќе се изнакупуваат алкохол пред девет навечер,“ вели жител на градот кој не верува дека мерката ќе даде резултат.

извор