Вести › Набрзинка

Зеленски: Трамп ѝ подари на Русија 10 милијарди долари за војната

13 март 2026

Украинскиот претседател Володимир Зеленски ја критикуваше одлуката на САД привремено да ги укине санкциите за руска нафта.
„Ова еднократно олеснување од страна на САД би можело да ѝ обезбеди на Русија околу 10 милијарди долари за војната. Тоа сигурно не помага за мир“, изјави Зеленски по средбата со Емануел Макрон во Париз. Тој не објасни како ја пресметал сумата од 10 милијарди.

Европските лидери се спротивставиле на таква мерка кога во средата се консултирале со Доналд Трамп во рамките на Г-7.
„Моментално постои проблем со цената, но не и со снабдувањето. Би сакал да знам кои други фактори ја наведоа владата на САД да ја донесе оваа одлука“, изјави германскиот канцелар Фридрих Мерц.
„Кризата во Ормускиот теснец во никој случај не го оправдува укинувањето на санкциите за Русија“, додаде Макрон.
„Некои тврдат дека треба да се вратиме на руските фосилни горива. Тоа би било стратешка грешка. Тоа би нè направило позависни, поранливи и послаби“, изјави претседателката на Европската комисија, Урсула фон дер Лајен.

13 март 2026

Загреб започна градење дигитална платформа која ќе дава целосна слика за состојбата на собраќајот во целиот град.
Проектот вреден три милиони евра, вклучува развој на систем што ќе интегрира информации од различни извори, вклучувајќи сензори за патишта, камери и системи за јавен превоз. Покрај моторниот сообраќај, платформата ќе вклучува и податоци за движењето на велосипедистите и пешаците.
Преку веб-страница или мобилна апликација, граѓаните ќе можат да ги следат условите на патиштата, да гледаат видео преноси од клучни раскрсници во реално време и да добиваат информации за привремени сообраќајни прописи. Апликацијата ќе овозможи и пријавување на сообраќајни проблеми и користење на разни е-услуги поврзани со јавниот превоз и паркирањето.

13 март 2026

На територијата на Ирак синоќа се урнал американски воен авион за долевање гориво, кој учествувал во воените операции против Иран.
Воената команда не соопшти дали имало жртви и нагласи дека во тек е операција за спасување на екипажот, кој вообичаено е составен од три лица – пилот, копилот и оператор.

ЕДИТ: Командата потврди дека загинале четворица од шестчлениот екипаж. За другите двајца нема информации.

Причината за уривањето не бил ни непријателски ни пријателски оган. Вториот авион од типот KC-135 Stratotanker што учествувал во операцијата безбедно слетал на аеродромот „Бен Гурион“ во Израел.

Летечките танкери постојано се користат во војната против Иран, во која американски авиони досега извршиле напади врз над 6.000 цели.
Неколку часа пред уривањето на авионот, бил пријавен и пожар во пералницата на носачот на авиони „Џералд Форд“, при што биле повредени двајца морнари.