- Пресудата против ИРЛ е загрозување на слободата на изразување, судот не смее да кажува кој е новинар, пишува во реакција на Самостојниот синдикат на новинари и медиумски работници (ССНМ).
- Сметаат дека образложението на пресудата на граѓанскиот суд во случајот Кочо Анѓушев и компанијата Брако против Истражувачка репортерска лабораторија (ИРЛ) и новинарката Сашка Цветковска е скандалозно, неприфатливо и незамисливо за едно демократско општество.
- „Со оваа пресуда која беше објавена вчера не се навлегува во суштината на тужбата за наводната клевета кон поранешниот вицепремиер Анѓушев во емисијата „Заговор против воздухот“ емитувана во 2021 година на МРТВ, туку се врши дискредитација на новинарите и на непрофитниот медиум ИРЛ сѐ со цел да се оправда пресудата на судијката Јованка Спировска Панева. Притоа се поставува досега невиден и опасен преседан судот и државните институции да одредуваат што е медиум, кој е новинар и кој смее да се бави со новинарска дејност. ССНМ смета дека токму овие произволни и паушални толкувања на Законот за медиуми, како и на Законот за здруженија и фондации претставуваат пред сѐ залажување на јавноста од страна на судот со цел оправдување на оваа скандалозна и досега невидена одлука во македонското правосудство“, реагираат од ССНМ.
- Полските власти официјално ја обжалија судската пресуда на ЕУ која ја обврзува Полска да му плати 1,3 милијарди долари на фармацевтскиот гигант Фајзер за вакцините против ковид што ги нарачала Европската Унија во име на Варшава.
- „Одлуката на првостепениот суд не ги зема предвид сите релевантни фактички и правни околности на предметот“, објави Министерството за здравство на Полска. Бара да се одложи извршувањето на одлуката додека трае постапката по предметот.
- Основа за казната за Полска е контроверзниот договор помеѓу претседателката на Европската комисија, Урсула фон дер Лејен, и директорот на Фајзер за нарачка на милиони дози на вакцини за ковид за потребите на сите членки на ЕУ. Таинственоста на преговорите ја отвори аферата Фајзергејт.
- Полска во 2022 година одби да ја преземе нарачката поради „променетата епидемиолошка состојба и војната во Украина“. Судот во Брисел на 1 април годинава пресуди дека мора да се почитува обврската кон фармацевтскиот гигант, кој не морал ни да ги произведува вакцините кои Полска ги одбила.
- Прва жртва на судската одлука беше полската служба за воздушна навигација PANSA, на која, иако нема никаква врска со вакцините, ѝ беа замрзнати средствата од европското тело за безбедност во воздухопловството Eurocontrol.
- 25 американски сојузни држави - сите предводени од демократите, поднесоа групна тужба против администрацијата на Трамп, тврдејќи дека најновиот бран царини за стоки од 59 трговски партнери и ЕУ ги надминуваат законските овластувања на претседателот за оданочување на увозот.
- Претходно и малите американски бизниси покренаа постапка за блокирање на царините истиот ден кога тие стапија на сила.
- Новите царини од 10% и 12,5% Трамп ги претстави како мерка за спречување увоз на стоки произведени со „принудна работа“. Покриваат 99,4% од вкупниот увоз на САД. Важат и за Кина, Европската Унија и Британија.
- И претходни претседатели се повикувале на Законот за трговија од 1974 година за борба против нефер или дискриминаторски економски практики на други држави. Но, сојузните држави тврдат дека царините со оваа основа биле насочени кон конкретни земји и индустрии, додека широкиот и неселективен пристап на Трамп нема историски преседан.
