Вести › Набрзинка

Вучиќ од Русите бара за 50 дена да најдат нов сопственик на НИС

25 ноември 2025

Српскиот претседател Александар Вучиќ изјави дека Србија ќе почека уште 50 дена Русија да најде купувач за Нафтената индустрија на Србија (НИС).
„Не сакаме да ја национализираме, но ако по 50 дена не се случи продажбата на НИС, немаме избор и ќе мора да ја претставиме нашата администрација и да им ја платиме на нашите руски пријатели највисоката можна цена“, изјави Вучиќ.
„Сакаме да покажеме колку ни е грижа за пријателството и не воведовме присилна администрација како во Бугарија и Романија. Сакаме да им ги дадеме тие 50 дена, а дури и тогаш нема да извршиме национализирање, ќе им дадеме повеќе пари отколку што побараа од партнерите. И сè ќе платиме веднаш, бидејќи нашите долгорочни односи нема да зависат од ова или она дејство во рамките на НИС“, рече Вучиќ.
Рафинеријата за нафта во Панчево, единствената рафинерија во Србија, го запре производството а постројките влегоа во таканаречена топла циркулација. Тоа е термин кога низ системот циркулира иста количина суровини за да се одржи функционалноста на системот.

извор

САД: Пекинг со еден повик може да ја запре војната во Украина

16 февруари 2026

Кина обезбедува клучна поддршка за руската агресија во Украина и би можела да ја заврши војната со еден телефонски повик, изјави американскиот амбасадор во НАТО.
„Пекинг би можел да му се јави на Владимир Путин и да ја заврши оваа војна утре, ако го прекине доставувањето технологии со двојна намена. Би можела и да престане да купува руска нафта и гас“, изјави амбасадорот Метју Витакер.
Русија се потпира на Кина за набавка за критични делови и компоненти за беспилотни летала и друга воена опрема. Откако Европа воведе санкции за Москва, Кина стана и најголем увозник на руска нафта.
Во јануари во кинеските пристаништа просечно пристигнувале по 1,65 милиони барели руска сурова нафта. Тоа е најмногу од март 2024 година и второ највисоко количество по инвазијата врз Украина пред четири години.
Кинеското Министерство за надворешни работи ги отфрли како „целосно неосновани“ обвинувањата дека ги поддржува воените напори на Русија.

извор

Почина Ленче Делова од Драмски

15 февруари 2026

Почина театарската, филмска и телевизиска глумица Ленче Делова, соопшти Драмски театар, нејзината матична куќа. Имаше 77 години.
Нејзиниот талент, сценска присутност и човечка топлина оставија неизбришлива трага на сцената и во срцата на публиката. Со секоја улога таа внесуваше искреност, емоција и посветеност, градејќи ликови кои долго ќе се паметат. Нејзината насмевка и ведриот дух беа светлина зад сцената, а нејзината професионалност пример за генерации актери, напишаа колегите.
Делова играла во 60-тина претстави во Драмски театар, а глумеше и во над 30 филмови.

извор