Уапсен е Миле Кекин, поранешниот фронтмен на групата Хладно пиво и сопруг на пратеничката Ивана Кекин, во врска со купување имот во Бује на Истра. Кекин наводно е обвинет за предизвикување штета помала од 7.000 евра.
Одделението за борба против организиран криминал и корупција (УСКОК) на Хрватска ја приведе и поранешната шефица за просторно планирање на Бује, а се претресува и градската управа и канцеларијата на градоначалникот.
„Мислите ли дека некој што може да заработи толку пари за еден саботен концерт би се изложил на кривично гонење? Секако дека не. Ова е наместено и политички инструментализирано“, изјави пратеничката Сандра Бенчиќ.
Аферата „Вила на Бује“ беше отворена спроти претседателските избори, на кои Ивана Кекин настапи како кандидатка на партијата Можемо. Таа ги отфрли критиките дека со сопругот незаконски го купиле имотот што го реновирале и привремено го изнајмуваат.
„Сè што сме стекнале во животот сме го заработиле со сопствени раце. Јас сум специјалистка за психијатрија, мојот сопруг е рок-ѕвезда, една од најголемите на овие простори. Мојот имот е пријавен, поголемиот дел стекнат пред да влезам во политиката“, изјави тогаш Ивана Кекин.
Украина извела силен напад со дронови поради што се затворени два битни аеродроми кои го опслужуваат рускиот главен град.
Руската против-воздушна одбрана срушила девет дрона кои се движеле кон Москва а запалена е хемиска фабрика на 30 километри од Кремљ.
Во меѓувреме, Русија соопшти дека за првпат во тригодишната инвазија, навлегла во источната украинска област Дњипропетровск што е прва поголема територијална ескалација во последно време.
Дњепропетровск е важен рударски и индустриски центар за Украина, а подлабокото руско напредување во регионот би можело да има сериозен негативен ефект врз војската и економијата на Киев, кои се во криза.
Колумбискиот десничарски сенатор и сериозен кандидат за претседателската трка идната година, Мигел Урибе Турбај, беше застрелан додека им се обраќаше на своите приврзаници во квартот Моделија во Богота.
Најверојатно бил застрелан в грб и глава и веднаш пренесен во болница во која, како што пиша неговата сопруга, се бори за живот.
Градоначалникот на Богота потврди дека осомничениот атентатор е уапсен а министерот за одбрана, Педро Санчез понуди награда од три милијарди колумбиски пезоси (715.000 долари) за информации кои ќе водат во идентификација на сите вклучени во заверата.
39 годишниот Мигел Урибе Турбај е десничарски ориентиран сенатор и влијателен член на опозициската партија Демократски центар, основана од поранешниот претседател Алваро Урибе (не се во крвно сродство). Тој е внук на поранешниот колумбиски претседател Хулио Сезар Турбај и син на новинарката Дијана Турбај, која беше убиена во 1991 година за време на неуспешна операција за спасување откако беше киднапирана од картелот Меделин на Пабло Ескобар.
Десничарските кругови на социјалните медиуми потсетуваат дека пред Урибе, во Еквадор беше убиен десничарскиот кандидат, Фернандо Виљавиченсио, во Бразил, десничарот Болсонаро беше избоден со нож а во САД Трамп преживеа два обида за убиство.
