Вести › Набрзинка

Требаше ли нашите од Дубаи да се евакуираат бесплатно?

11 март 2026

Враќањето на своите државјани од военото подрачје околу Иран со јавни пари го финансираа држави како Македонија, Босна, Србија, Хрватска и Словенија, за разлика од далеку побогатите и социјално сензитивни нордиски земји.
Хрватските даночни обврзници ги чинело 850.000 евра за репатријација на 845 хрватски државјани кои американско-израелскиот напад врз Иран ги затекнал во блискоисточните земји.
Словенечката влада издвоила 1,5 милиони евра, онаа на Босна и Херцеговина околу 400.000 евра.
Скандинавски ладен беше одговорот на шведската министерка за надворешни работи, Марија Малмер Стенергард, на прашањето дали шведската војска со своите авиони треба да помогне во евакуацијата:
„Моментално не сме во ситуација да ги користиме ресурсите на вооружените сили. Воениот буџет и парите што ги издвоија вредните Швеѓани секогаш треба да се чуваат.“
Седиште во авионот во кој Шведска превезуваше свои државјани од Дубаи до Стокхолм чинело 1.100 евра за возрасни и 850 евра за деца. Со моментално плаќање на сметката на министерството за надворешни работи. Во спротивно, се губи резервацијата.

извор

Имаме нов Колегиум

1 април 2026

Луѓето кои останаа без работа откако згасна македонскиот сервис на Радио Слободна Европа, се здружиле во нов медиумски проект на нашата сцена.
Велат дека „Колегиум.мк е за читатели кои сакаат да знаат повеќе, а не само побрзо“.
„Целта е да отвораме и теми што често остануваат на маргините – приказни за луѓе, за локални проблеми и за одлуки што директно влијаат врз секојдневниот живот. Но, и да понудиме иновативен пристап со кој секој од Вас може да се стави во чевлите на луѓе кои заглавуваат низ системот, да ги поминете скалилата и сопките на кои секој може да наиде и да бидете едуцирани и подготвени за нив“, се наведува во првиот едиторијал.
Колегиум, аирлија работа.

извор

Следни мети на Иран се големите американски технолошки компании

1 април 2026

Иранската револуционерна гарда објави дека деновиве ќе почне да ги напаѓа американските компании во регионот како одмазда за нападите врз Иран.
На мета се Микрософт, Гугл, Епл, Интел, ИБМ, Тесла и Боинг.
Војната е во 33-от ден. Техеран ги напаѓа регионалните сојузници на САД и Израел, Трамп тврди дека ги растураат Иранците, Израел жестоко го гранатира Либан, ЕУ повикува Тел Авив да се воздржи од копнена инвазија.

Техеран го одбил американскиот план во 15 точки, доставен со посредство на Пакистан како неразумен и максималистички. Порачуваат дека не се заинтересирани за примирје туку само за траен мир. Бидејќи двапати (и лани и годинава) биваат нападнати додека преговараат.
Трамп повторно навести дека може да свири крај на војната без да го отвори Хормускиот теснец. Пошто европските сојузници не му помогнале, сами нека го отвораат за да си ја добијат нафтата. Тие имале доволно.

извор