Вести › Набрзинка

Трамп ќе наплаќа по 100.000 долари за „дојави“ на Truth Social

2 август 2026

Платформата Truth Social на Доналд Трамп понуди нова услуга за привилегиран и ран пристап до објави на најактивните профили. Иако не е директно спомнат, се алудира на профилот на Трамп, кој има 13 милиони следбеници.
Бизниси и лица што може да си дозволат да плаќаат 100.000 долари месечно за услугата Truth API ќе имаат „директен и лиценциран пристап во реално време на објавите на платформата“. Другите ќе имаат пристап до објавите со задоцнување.
Критичарите тврдат дека услугата е очигледен пример за манипулација на пазарот и тргување со инсајдери. Трамп постојано преку Truth Social ги објавува своите најважни одлуки, особено оние што се поврзани со војната во Иран и со царините. Досега имало низа случаи на добивки од сомнителни трансакции на берзите и од облози направени непосредно пред претседателот да објави промени во политиката.
Сенаторите Адам Шиф и Елизабет Ворен ја повикаа Комисијата за хартии од вредност да ја испита новата услуга и да истражи дали Truth Social го крши законот. „Се чини дека ова е скандалозна злоупотреба на функцијата на претседателот за негова лична корист што ги поткопува секојдневните инвеститори и интегритетот на нашите пазари, а воедно ги збогатува Волстрит и другите богати инсајдери“, напишаа сенаторите.

извор

САД фрлиле бомба од 1 тон врз семејна куќа во Иран

2 август 2026

Визуелна истрага на Њујорк тајмс покажува дека американските сили во четвртокот фрлиле бомба од 900 килограми врз семејна куќа на иранскиот остров Кешм во Ормускиот проток. Загинале маж, жена и нивниот двегодишен син, а две други деца биле извлечени живи од урнатините.
Во околина на куќата, во густо населениот кварт Чах-Тангу, не е лоциран објект што би можел да биде потенцијална воена цел. Нема ни извештаи за воени жртви при нападот – информации што иранските власти вообичаено ги објавуваат. Во истиот бран напади биле погодени два магацини на приодите кон градот.
Врз основа на видеоснимки, сателитски снимки, големината на кратерот и фрагментите од бомбата, експерти за оружје заклучиле дека нападот одговара на дејство на американска бомба „Марк-84“ со систем за наведување JDAM, една од најразорните во конвенционалниот арсенал на САД.
Бомбата била детонирана по ударот и направила кратер со дијаметар од 10 метри. Овој тип бомби типично се користат за уништување згради, железнички јазли и комуникациски центри.
Американската централна команда не објави што било гаѓано во населбата во Кешм. Соопшти дека ги разгледува извештаите за цивилни жртви, но упорно тврди дека никогаш не нишани кон цивили“.

извор

Мароко му „подари“ на Трамп автопат од 1.000 километри

2 август 2026

Најамбициозниот инфраструктурен и политички проект во Мароко – автопатот од Тизнит до Дахла, ќе го носи името „Претседателот Доналд Џ. Трамп“.
Ова се смета за израз на благодарност затоа што САД во 2020 година го признаа мароканскиот суверенитет врз Западна Сахара, како дел од договорот со кој Мароко ги нормализираше односите со Израел. Кралството има територијален спор со Шпанија и со Алжир за Западна Сахара, регион кој Обединетите нации сè уште го третираат како „територија без сопствена управа“.
Именувањето на патот се поврзува и со инвазијата на 60.000 луѓе од Мароко во Сеута. Шпански разузнавачи ја предупредиле владата на Педро Санчез дека мароканските сили за безбедност не само што не го спречиле бранот, туку и можеби го поттикнале, носејќи илјадници луѓе кон границата.
Изградбата на автопатот, еден од најдолгите во Африка, чинеше околу 1 милијарда долари. Поголемиот дел од трасата долга 1.055 километри минува низ Западна Сахара. Се протега покрај брегот на Атлантикот, од Тизнит во јужен Мароко до Дахла, каде што до 2028 година ќе биде изградено стратегиско важно пристаниште.
Трамп му се заблагодари на кралот Мухамед Шести, ја опиша неговата одлука како „голема чест“ и куртоазно изрази желба да патува по „својот“ автопат од крај до крај.

извор