- Трамп ќе мора да почека за Нобел до идната година. Нобеловата награда за мир за 2025 година ѝ е доделена на Марина Корина Мачадо, лидерка на венецуелската опозиција, за „промовирање на демократските права во нејзината земја и за борбата за мирна транзиција кон демократија“.
- „Г-ѓа Мачадо ја добива Нобеловата награда за мир пред сè за нејзините напори за унапредување на демократијата во Венецуела. Но, демократијата е загрозена и на меѓународно ниво. Сфатена како право слободно да се изрази своето мислење, да се гласа и да се биде претставен во власт, таа е основа на домашниот и меѓународниот мир“, објави Норвешкиот комитет.
- Мачадо основала фондација за грижа за бездомни деца во Каракас, а потоа и организација за промоција на слободни и фер избори. Во 2010 година беше избрана за пратеничка, но режимот на Николас Мадуро ѝ го одзеде мандатот. Во 2024 година ѝ беше забрането да се кандидира на претседателските избори, на кои за победник беше прогласен Мадуро, иако опозицијата тврди дека мнозинство гласови освоил нејзиниот кандидат Едмундо Гонзалес Урутија.
- „Мачадо е принудена да живее скришно. И покрај сериозните закани по нејзиниот живот, таа остана во земјата, што инспирираше милиони луѓе. Клучно е да се препознаат храбрите бранители на слободата кои се креваат и се спротивставуваат“, објави Комитетот.
- Коментирајќи го агресивната кампања на Доналд Трамп да ја добие престижната награда, претседавачот на Норвешкиот комитет, Јерген Ватне Фриднес индиректно изјави: „Комитетот добива илјадници писма секој ден, но решава во соба полна со храброст и интегритет“.
- Владата на Аргентина побара да бидат обновени преговорите со Обединетото Кралство во врска со суверенитетот над Малвините (Фолкландските Острови), откако администрацијата на Доналд Трамп најави дека САД може да ја откажат политичката поддршка за Британија во територијалниот спор.
- Во внатрешен меморандум во Пентагон е наведено „преиспитување на дипломатската поддршка за британските империјални поседи“ како можна казна за „непослушните“ сојузници на САД од НАТО, кои ги одбиле повиците да се приклучат во војната против Иран.
- „Аргентина е подготвена да ги продолжи билатералните преговори со Британија за изнаоѓање мирно и конечно решение за спорот за суверенитетот (на островите) кое ќе стави крај на посебната колонијална ситуација во која се наоѓаат“, порача министерот за надворешни работи Пабло Кирно.
- Даунинг стрит објави дека извештајот за меморандумот на Пентагон не го променил ставот на Британија. „Жителите на Фолкландските Острови на референдум гласаа со огромно мнозинство за да останат прекуокеанска територија на Обединетото Кралство“, изјави портпарол на кабинетот на премиерот Кир Стармер.
- Аргентина долго време претендира на суверенитет над Малвините и изврши инвазија врз архипелагот во 1982 година пред да биде поразена од Британија во кратка, но крвава војна.
- Претседателот Хавиер Милеи пред две години изјави дека Аргентина не се откажува од суверенитетот врз островите, но не сакаа конфликт со Обединетото Кралство: „Тие можеби не сакаат да преговараат денес, но во иднина можеби ќе сакаат. Многу позиции се променија со текот на времето“.
- Доналд Трамп го продолжи прекинот на огнот со Иран на „неодредено време“, но на 1 мај завршува законскиот рок од 60 дена за воени операции без експлицитно овластување од Конгресот. Претседателот ќе мора до тогаш да ги повлече воените сили, освен ако не добие специјално одобрување од Претставничкиот дом и Сенатот.
- Постои опција да добие дополнителни 30 дена, само ако писмено потврди дека е потребно време за безбедно повлекување на трупите, а не за продолжување на офанзивата.
- Поранешните претседатели ја заобиколуваа законската одредба со други извори на овластувања. Трамп може да се повика на Овластувањата за употреба на воена сила (AUMF) за специфични цели, применети по нападите од 11 септември 2001 година за „војната против теророт“, во 2002 година за да се отстрани Садам Хусеин и во 2003 година да се одобри инвазијата на Ирак.
- Трамп во првиот мандат во 2020 година го искористи AUMF за да го нареди атентатот врз иранскиот генерал Касем Сулејмани.
- За време на воената кампања на во Либија во 2011 година, администрацијата на Барак Обама тврдеше дека не е потребно експлицитно овластување од Конгресот, бидејќи нема „активна размена на оган со непријателски сили“.
- Бил Клинтон одобри неколку воени операции во Ирак и во Сомалија, а во март 1999 година без одобрение од Конгресот одобри воени дејства против тогашната Сојузна Република Југославија.
