- Обвинителството поднесе жалба на двегодишната пресуда за Менсур Пајазити за сообраќајката во која животот го загуби Теодора Ристовска во Тетово.
- Го имале предвид мислењето на Судскиот совет според кое првостепената пресуда не може да биде повисока од онаа на Апелација која првиот пат досуди две години, но тоа е за ситуација кога само обвинетиот поднесува жалба.
- Сега тие поднесуваат жалба по барање на семејството на жртвата кое нема право на жалба.
- Од вишата обвинителка од Гостивар, Вјолца Елмази, која се предомислила па барањето да се одбие жалбата на Пајазити го сменила со согласност да му се изрече поблага кривична санкција, никој не побара да го објасни ваквиот потег.
- Таа како олеснителна околност за Пајазити навела дека „ПРИЗНАЛ ВИНА“, небаре се работи за комплициран сајбер криминал па е потребно да признаеш дека си убил човек со кола.
- Полска најави дека официјално ќе поднесе барање за воени репарации од Русија, за злосторства извршени од Црвената армија во Втората светска војна и во периодот на советските интервенции во Студената војна. Премиерот Доналд Туск наредил формирање тим историчари за да ги проценат штетите.
- Варшава веќе побара од Германија да ѝ плати 1.300 милијарди поради злосторствата извршени од нацистичките сили за време на Втората светска војна. Канцеларот Фридрих Мерц одговори дека од перспектива на Берлин, прашањето за репарации одамна е правно и политички затворено.
- Бартош Гондек, директор на институтот задолжен од Туск, изјави дека истрагата за Русија е пообемна, со оглед на тоа што Полска поминала четири децении под советско влијание.
- Коментирајќи ја заканата од Полска, портпаролката на руското Министерство за надворешни работи, Марија Захарова изјави: „Како репарација, можеме да обезбедиме линк до видеото од операта Иван Сусанин“.
- Поранешниот украински министер за енергетика, кој е обвинет за злоупотреба на над 100 милиони долари од енергетскиот сектор, може да биде ослободен од притвор со кауција од околу 10 милиони долари.
- Херман Халушченко, кој важи за близок до претседателот Зеленски, беше приведен при обид да ја напушти Украина со воз, непосредно пред официјално да му биде предадено известувањето дека е осомничен во случајот со висока корупција „Мидас“ за злоупотреба на 112 милиони долари од енергетскиот сектор, испрани преку офшор структури, криптовалути и инвестиции во фонд регистриран на островот Ангила.
- На сметки на семејството на Халушченко во Швајцарија биле префрлени 7,4 милиони долари, плус уште 1,3 милиони швајцарски франци и 2,4 милиони евра во готово.
- Парите биле потрошени за образование на децата на Халушченко во престижни училишта во Швајцарија или биле депонирани на сметки на неговата поранешна сопруга.
- Во исто време, енергетскиот систем нема средства за поправка по руските бомбардирања и Украинците останаа без струја и греење во неовобичаено студената зима.
