- Српските студенти од синоќа ги блокираат зградите на државната телевизија РТС во Белград, на РТ Војводина во Нови САД и на Радиотелевизија Крагуевац.
- Жандармеријата синоќа се пресметале со група студенти на блокадата на „Таковска 10“ пред РТС. Има повредени.
- Претседателот Александар Вучиќ се фотографираше со повреден полицаец „нападнат од „бољшевички пленумаши“. На снимки се гледа дека полицаецот во цивилка бил удрен од жандарм.
- РТС не емитува утринска програма. Студентите не дозволуваат никој да влезе во телевизијата и пред зградата поставија шатори.
- Вучиќ и министерот за внатрешни Дачиќ се скарале пред камерите на ТВ Пинк. Дачиќ рекол: „Некои медиуми тргнаа да лажат, немаше никаква интервенција...“ на што Вучиќ си заминал со зборовите: „Извини, не можам повеќе да го слушам ова оправдување“.
- Министерството за правда на САД објави десетици илјади документи од дебелото досие за Џефри Епстин. Јавноста очекуваше дека ќе види докази за врски на претседателот Доналд Трамп со синџирот за елитна проституција, но тој е спомнат само неколку пати, во неутрален контекст.
- Ама, во објавените материјали има повеќе од 20 фотографии за поранешниот претседател Бил Клинтон - прикажан во џакузи, покрај девојки или како плива заедно со Гислен Максвел, партнерката на Епстин.
- Во обемната библиотека што може да се пребара тука, има и фотографии од британскиот принц Ендрју и од естрадни ѕвезди како Мајкл Џексон, Дајана Рос и Мик Џегер во друштво со Епстин. Нема објаснувања кога биле направени фотографиите и во каков контекст.
- Во документите се зацрнети имиња на повеќе од 1.200 девојки и други лица што се сметаат за жртви во синџирот за проституција. Во едно досие се зацрнети повеќе од 100 страници.
- Во архивите на Министерството има уште илјадници документи за Епстин, кои ќе бидат објавувани во фази, откако ќе бидат заштитени идентитетите на потенцијалните жртви.
- Американски авиони и хеликоптери вчера извршиле воздушни напади врз 70 цели на групата ИСИС во Сирија како одмазда за убиството на двајца американски војници и нивниот преведувач пред една недела близу Палмира.
- „Ова не е почеток на војна, туку одмазда. Под водство на претседателот Трамп, САД никогаш нема да се колебаат за одбрана на нашиот народ“, порача шефот на Пентагон, Пит Хегсет.
- Ова е прва голема интервенција на САД по затоплувањето на односите со привремениот сириски претседател Ахмад ал Шара, поранешен лидер на терористичка група по кого беше распишана американска потерница со награда од 10 милиони долари.
- Трамп синоќа ја повтори поддршката за Ал Шара и за сириските владини трупи, за кои оцени дека се „на страната на САД“ во борбата против тероризмот.
