- Специјален трибунал во Бангладеш ја осуди на смрт поранешната премиерка Шеих Хасина, за обвиненија за злосторство против човештвото. На смрт е осуден и министерот за внатрешни работи Асадузаман Кан поради крвавото задушување на студентските процеси минатото лето, по кои беше соборена владата.
- Привремените власти тврдат дека во текот на јули и август 2024 година полициските сили убиле повеќе од 800 луѓе и раниле уште 14.000. Обединетите нации во извештај од февруари годинава заклучија дека загинале 1.400 луѓе.
- На Хасина и Кан им се судеше во отсуство. Тие лани побегнаа во Индија. Можат да ја обжалат казната само ако се вратат во Бангладеш и ако им се предадат на властите.
- И двајцата ги отфрлаат обвиненијата и тврдат дека „дејствувале со добра намера, за да се избегнат повеќе жртви“. „Изгубивме контрола цврз ситуацијата, но факт е дека тоа не беше планиран напад врз граѓаните“, изјави Хасина во првата реакција на пресудата.
- По соборувањето на режимот на Хасина, за лидер на привремената влада на Бангладеш беше назначен нобеловецот за мир Мухамад Јунус. Тој веднаш ја забрани владејачката партија и вети дека премиерката ќе биде казнета.
- Украина ќе купи од Франција 100 борбени авиони „рафал“ произведени од компанијата „Дасо“. Договорот за намери за десетгодишно „стратегиско партнерство“ го потпишаа претседателите Володимир Зеленски и Емануел Макрон пред паркиран „рафал“ на воен аеродром близу Париз.
- „Постигнавме историски договор. Ќе ја зајакнеме нашата авијација, противвоздушната одбрана и други одбранбени капацитети“, објави Зеленски.
- Детали за бројот на авиони, начинот на испорака, другото оружје и сумата што ќе ја плати Киев не се објавени. Некои Франција може веднаш да ги испорача од своите хангари, но повеќето допрва треба да бидат произведени.
- Украина сега има флота од околу 250 борбени авиони, вклучувајќи американски „ф-16“ и шведски „грипен“. Макрон во октомври ѝ понуди на Украина постари авиони „мираж“ и противвоздушни проектили „астер 30“, произведени специјално за украинската артилерија.
- Доналд Трамп ги повика републиканците во Конгресот да гласаат за објавување на сите документи поврзани со Џефри Епстин, за да се потврди дека нема никакви допирни точки со неговата мрежа за сексуална злоупотреба на девојки.
- „Време е да се затвори оваа лага што ја шират улавите од радикалната левица за да се пренасочи вниманието од големиот успех на републиканците да го деблокираат финансирањето на владата“, порача Трамп.
- Претседателот тврди дека ги прекинал сите врски со Епстин пред да биде откриено дека тој им местел девојки на лица од политичката и естрадната елита. Во еден од мејловите објавени од демократите пред една недела Епстин запишал дека „Трамп знаел за девојките“, но за претседателот не се пронајдени компромитирачки детали во документите што досега протекоа до јавноста.
