Вести › Набрзинка

Словачка гласаше за „доста е војна“

1 октомври 2023

На изборите во Словачка победи партијата СМЕР на трикратниот премиер Роберт Фицо кој повтори дека земјата има и поголеми проблеми од воено помагање на Украина.
Пред изборите, Фицо се залагаше за прекинување на воената помош на Украина и што побрзо организирање мировни преговори. По победата, рече дека сака да ѝ помогне на Украина во хуманитарни прашања но дека ставот за воената помош останува ист.
СМЕР ја победија Партијата на прогресивна Словачка, а коалиционите преговори за формирање влада ќе траат неколку недели.
Фицо е роден во работничко семејство, дипломирал право по паѓањето на комунизмот станува пратеник а и ја застапуваше Словачка на Европскиот суд за човекови права.

извор

Младите избегаа, Украина нема војници

12 ноември 2025

Градоначалникот на Киев, Виталиј Кличко, побара Украина да ја спушти возраста за мобилизирање затоа што сè потешко може да најде војници откако рекорден број мажи заминаа во Европа.
„Порано 18-годишници служеа во армијата, но тоа се деца. Сега се мобилизираат на возраст над 25 години. Може да се спушти границата на 22 или 23 години“, изјави Кличко.
Повеќе од 100.000 млади Украинци заминале во европските земји откако владата во август им дозволи на младите мажи на возраст од 18 до 22 години да ја напуштат земјата. Само во септември европските земји им дале привремен азил на 79.000 Украинци, рекорден број во еден месец откако почна војната.
Кличко вели дека иднината на земјата зависи од тоа дали младите ќе се вратат кога ќе заврши војната. „Би биле пресреќни ако половина од младите се вратат. Но, за тоа ни се потребни мир, работа и квалитет на животот“, изјави Кличко.

извор

Градоначалникот на Истанбул соочен со 2.340 години затвор

11 ноември 2025

Против Екрем Имамоглу, притворениот градоначалник на Истанбул, се покренати 142 обвиненија за корупција, за кои е предвидена вкупна казна од 2.340 години затвор.
Обвиненијата на вкупно 3.700 страници се однесуваат на случаи за проневера, измама и перење пари. Покрај Имамоглу, уште 402 лица од криминалната организација „октопод“ се обвинети за предизвикување штета од вкупно 160 милијарди лири (3,3 милијарди евра) во изминатата деценија.
Целта на организацијата, според обвинителите, била преземање контрола врз Републиканската партија и собирање фондови за претседателската кампања.
Имамоглу, кој е во притвор од 19 март, ги отфрла сите обвиненија и тврди дека е жртва на политички прогон, како главен противник на претседателот Реџеп Тајип Ердоган.

извор